Hashi: Nakkutiliinerup annertussusaa taamaaginnartoq politiinilli arsaarinnissutigineqartoq annikinnerusoq
![](/sites/default/files/styles/image_934x467/public/article_images/7v9a8633.jpg?itok=0hF7xVE9)
Nunarput tamakkerlugu hashi arsaarinnissutigineqartoq 2022-mi 130 kiilup missaaniippoq. Siorna – tassa 2023-mi – arsaarinnissutigineqartoq 96 kiilup missaannaanniippoq.
Tamanna politiit ukiumoortumik naatsorsuinerata takutippaa.
Tassa politiit hashi 2023-mi arsaarinnissutigisaat ukiup siulianut sanilliullugu 34 kiilumik annikinneruvoq. Politiit oqarnerat naapertorlugu annikinnerunera toqqaannartumik pissuteqartutut nassuiaatigineqarsinnaanngilaq, pissutigalugu:
- Hashimik 500 grammimik imaluunniit 20-30 kiilumik nassaaraangatta ilaatigut nalaatsornerinnaasarpoq. Taamaammat ukiumit ukiumut nikerartarpoq, naak nakkutilliinerput allanngunngikkaluartoq.
- Aammami aaqqissuussamik pinerluuteqarnermik misissueqqissaartarpugut, tassanilu qanoq annertutigisumik nassaarnersugut aamma nikerartarpoq, Kalaallit Nunaanni politiinspektørip tullersortaa, Lars Bjerregaard oqarpoq.
Killiffik
Nakkutilliinerulli annertussusaa, akitsuuserisuniinerusoq ukiup siuliinut sanilliullugu allanngunngitsoq taassuma erseqqissaatigaa.
Naak poltiiit ukiut siuliinut sanilliullugu hashimik annikinnerusumik arsaarinnissuteqaraluartut tamanna annikinnerusumik anngiortumik eqqussuisoqartalerneranik isumaqanngilaq.
- Ikiaroornartumut tunngatillugu 2023-mi suliat 2022-mi suliatta amerlaqatigipajaarpai. Taamaammat anngiortumik eqqussuineq allanngungaatsiarsimanngissoraarput, kisianni tamanna qularnangaatsiarpoq, politiinspektørip tullersortaa oqarpoq.
Kangerlussuarmi Nuummilu arsaarinnissutigineqartut 43 kiilu aamma 34 kiilup missaaniittoq arsaarinnissutigineqartunit annerpaasut ukiumoortumik naatsorsueqqissaarnerup takutippaa.
Sumiiffiit taakku marluk sulianut allanut sanilliullugit aamma suliaqarfiunerpaapput. Ikiaroornartunut tunngatillugu suliat Nuummi 243-pput, Kangerlussuarmilu suliat 155-it nalunaarsorneqarlutik.
Timiminnut toqqorsisut ikinnerusut
Taassuma kisitsit 2022-mit 2023-mut sooq apparnera eqqorluarnerumik eqqoriarsinnaanngilaa.
- Taamaallaat arsaarinnissutigineqartoq annikinnerusoq timiminnullu toqqorterisimasutut ikinnerusut inerniliissutigiinnarsinnaavarput.
Timiminnummi toqqorterisimasut 62-init 46-nut ikilipput, Lars Bjerregaardillu timiminnut toqqorterisimasutut ukkatarineqangaatsiarsimanerarpai.
- Neriuppunga tamanna ikinnerusut periarfissamik atorniaanerannik annikinnerulersitsimaneranik takussutissiisoq, tamannami inuunermut navianartuuvoq. Ikiaroornartumik anngiortumik eqquissuineq aarlerinartoqartoq ilisimaneqassaaq, Lars Bjerregaard naggasiivoq.