Politikkikkut naliliisartoq: Muté B. Egede qinersisoqannginnerani nukittuumik inissisimavoq

Inatsisartunut tulliani qinersinissaq kingusinnerpaamik apriilip arferngani pereersimassaaq. Tassa ukioq ataasiunngitsoq qaanngiuppat.

Qinersinissarlu Inatsisartut ukiaanerani ataatsimiinnissaanni sunniuteqassaqisoq, KNR-ip politikkikkut naliliisartuata, Ineqi Kielsenip ilimagaa.

- Takusinnaavarput inatsisartunut ilaasortat arlalinnik siunnersuuteqartut. Taakkulu immaqa aamma takussutissiisinnaapput qinersinerup qanillillernerani innuttaasunut qanimut sulisimanertik ersersinniaraat, taanna oqarpoq. 

Qinersinerup suaarutigineqarnissaa qanillisoq piffissami sivitsortumi ilimagineqarpoq.

Siumumi tunuliaqutaasut ilaat partiip politikkia iluarinagu partiip iluani ukioq manna februaarimi toqqissisimanngitsoqarpoq, qinersisoqarnissaanillu eqqarsalersitsilluni.

Aalisarnermut inatsisissap akuerineqarnissaa taamani naammagittaalliutaavoq.  

- Aalisarnermut inatsisissaq akuersaarneqassappat ilungersunartumik inissisimavoq, taamaattumik isumaqarpunga qinersinissaq pisariaqartoq, Aasianni Siumup immikkoortortaqarfiani siulittaasup tullia, Enok Sandgreen, taamani oqarpoq.

Inatsisartulli upernaakkut ataatsimiilerput, aalisarnermullu inatsit nutaaq akuerineqarpoq.

Ukiakkut ataatsimiinnissaq qallivoq, qinersisoqarnissaanillu eqqarsaatersuuteqartoqaqqilereerluni.

Maanna qinersisoqassappat pitsaaqutit ajoqutillu

Ineqi Kielsen Siumut sinnerlugu inatsisartunut ilaasortaanikuuvoq partiiminili ilaasortaajunnaarnikuulluni, Múte B. Egedelu partiimini Inuit Ataqatigiinni nukittuutut inissisimasoq taanna isumaqarpoq.

Naalakkersuisullu siulittaasuat inatsisartut ukiakkut septembarip ulluisa 20-anni ataatsimiilernissaannut ammaanersiornermi oqalugiarnermini qinersisoqarnissaanik tamanna pillugu nalunaaruteqarnavianngitsoq, Ineqi Kielsen isumaqarpoq.

- Naalakkersuisoqatigiit aappaagumut aningaasanut inatsisissatut siunnersuut saqqummiutereerpaat, akisussaassuseqartumik aningaasaqarnermut politikkeqarnertik tassani takutissinnaavaat, Ineqi Kielsen oqarpoq.

Ukiakkut qinersisitsisoqassagaluarpat silap unerisimanngittarnera ajoqutaanerpaassangatinneqarpoq.

- Sineriak tamakkerlugu ukiakkut silarluttarnera nalunngilarput. Kujataani Avannaanilu maanna kinguaattoortorpassuaqalereerpoq, Ineqi Kielsen oqarpoq.

Ukiummi taamaalinerani silarluttarnera timmisartullu kinguaattoortarnerat qineqqusaarlutik angalanianut akimmisaartitsisinnavoq.

- Taava aamma ukiakkut qinersisitsinermi ilisimaarivarput KNR-ip aningaasaat missingersuutini tamakkipajaarlugit atoreersimasarai, taamaattumik amerlanerusunik sinerissami qineqqusaartitsinissamik aaqqissuinissamut ilaatigut immikkut aningaasaleeqqinnisaamut periarfissaqarpallaartarnani, taanna oqarpoq.

Politikerit isumaqatigiippallaartut

Qaammatip tulliani imaluunniit ukiup affaata tulliuttup ingerlanerani qinersisoqassagaluarpalluunniit politikerit isumaqatigiittuusaarunaarlutik pingaartitaminnik ersersitsinissaat piffissanngorpoq.

Qinersiseqarluarniarunimmi taamaaliortariaqartut Ineqi Kielsen isumaqarpoq:

- Partiit sipaarnerpaanissamik oqariartuuteqarlutik ataatsimoorfeqarput.

- Partiit assigiinngissutaat ersersinneqassappata soqutiginarsinnaasorujussuuvoq qinersisartutut qanoq partiit assigiinngissusaat takusinnaassallugu. Qanoruna neriorsuuteqarniartut? Partiit qanoq qineqqusaaruteqarniarpat? Tassami taakku siunissami sulinissaannut qinersineq ingerlanneqartussaammat, siunissamimi sipaarniarluni oqaluinnarneq naammanngilaq, taanna oqarpoq.

Ineqi Kielsen Siumut sinnerlugu Inatsisartuni ilaasortaasimavoq aamma Inatsit Tunngaviusussaq pillugu Isumalioqatigiissitami siornatigut siulittaasuulluni. Taassumali parteerisimasani Siumut maanna ilaasortaaffiginngilaa. Assi © : Anda Hansen / KNR

Qinersisoqangajalernera inatsisartut ukiakkut ataatsimiinneranni malugineqarsinnaassasoq ilimagaajuk?

- Inatsisartut ataatsimiittarfianni oqallittoqangaatsiarsinnaavoq. Partiillu illuatungiliuttut naalakkersuisuutitaqalernissaannut piffissanngortoq illuatungiliuttut oqaatigissagaat ilimagisinnaavara, taanna oqarpoq nangillunilu:

- Inuit Ataqatigiit Siumullu qanoq iliuuseqassanersut pissanngatigaara.

- Massakkut isumaqatigiittorujussuupput. Assigiinngissuteqarneralli aamma ersarissinerulersinnaassaaq, ilaasortallu ataasiakkaat naalakkersuisoqatigiit anguniagaannut allaanerusunik aamma suliniuteqaratarsinnaapput, Ineqi Kielsen oqarpoq.

Inatsisartut ukiakkut ataatsimiinnissaat ukioq manna piffissanut marlunnut avinneqarpoq. Ataatsimiinnerup immikkoortua siulleq septembarip ulluisa 20-anni aallartissaaq, novembarillu ulluisa 21-ata tungaanut ingerlassalluni. Ataatsimiinnerup immikkoortuata aappaa aappaagu februaarip ulluisa sisamaannit februaarip ulluisa 19-iata tungaanut pisussatut pilersaarutigineqarpoq.