20-nik ukiulik hashimik 2 kilongajammik timiminut nippussuisimasoq unitsinneqartoq
![](/sites/default/files/styles/image_934x467/public/2023-11/7V9A0249.jpg?itok=5G3RtiTS)
Angut inuusuttoq Kangerlussuarmi akileraaruserisunit ippassaq ulloqeqqata qaangilaarnerani unitsinneqarpoq.
Angut Danmarkimiit Ilulissiartilluni Kangerlussuarmi mittarfimmiit ingerlaqqinngitsoortoq, nunatsinni politiit pigaartuisa pisortaat Bjørn Bjerregaard oqaluttuarpoq.
- Akileraaruserisut suleqatigalugit angut unitsipparput, 1,8 kilomillu hashimik timiminut nippussuisimasoq paasivarpoq, pigaartut pisortaat oqarpoq.
Eqqartuunneqassaaq
20-nik ukiulik politiinit tigusarineqarpoq, suliarlu eqqartuussivimmi suliarineqassaaq. Pisoq pillugu annertunerusumik pigaartut pisortaat oqaaseqarsinnaanngilaq.
Politiit akileraaruserisullu nunatsinnut hashimik eqqusseriartunik, sapaatit akunnerata ingerlanerani maanna pingajussaa unititsipput.
Pisut siulliit marluk sapaatit akunnnerata naanerani Nuummi unitsinneqarput. Siulleq timimini hashimik toqqortaqarpoq aappaalu nassatamini toqqortaqarluni.