Naja Lyberth spiralilersuisoqarsimanerata saqqummiunneqarneraniit ukiup affaa ingerlareersoq: Ulloq manna tikilluinnarlugu misissorneqartariaqaraluar-poq
Nuummi Naja Lyberthip illuata silataani anorersuaq malissuarnik qaarartitsivoq.
Tamasuma 2022 soorluli takussutissartarigaa: DR-ip podcastimik tusarnaagassiaani Naja Lyberth 14-inik ukioqarluni akuersiteqqaarneqarani spiralilertissimanini pillugu sassarluni oqaluuserimmagu aalassatsitsivoq. Oqallinneq sakkortooq aallartippoq - sulilu ingerlanneqarpoq.
Naja inimi isersimalluni issiavimmi isikkani natermiitilluarlugit issiavoq. Assai niuanut inissillutik paarlassimapput, nipaalu eqqissisimavoq.
AAMMA ATUARUK Naja Lyberth spiralilersuisoqarneraneersoq BBC-p arnanut isumassarsisitsinerpaanut 100-nut allattorsimaffiani ilaasoq
- Tamanna inuuninni nalaassimasanni ajornerpaavoq. Spirali angivallaarujussuarpoq, ilusiuinermullu atortoq niviarsiaqqap timaanut atugassiaanngilaq. Kingusiinnaq nakorsamiit anisitaaginnarpunga arlaannaatigulluunniit ilisimannittoqarani, isumassuisoqarani misigeqataasoqaraniluunniit, naatsorsuutigineqaannarporlu anniarujullunga atuarfiliaqqiinnassasunga, Naja Lyberth oqaluttuarpoq.
1976-imi Maniitsumi nakorsap Naja spiralilerpaa.
Taamanikkut Najap ilisimasimanngilaa tamanna danskit oqartussaasuisa kalaallit amerliartoqqunagit spiralilersuinissamut inassuteqarnerisigut pisimasoq.
Nunanit tamalaanit maluginiarneqartoq
DR-ip ”Spiralkampagnen”-imik taallugu podcastimik tusarnaagassiaani maajimi saqqummertumi tusaaneqarsinnaavoq kalaallit niviarsiaqqat ilaat 13-iinnarnik ukiullit 1966-ip 1975-illu akornanni spiralilerfigitinneqarsimasut - aperineqaqqaaratik spiralilerneqarsimallutik amerlasuut oqaluttuarput.
Arnanut taakkununnga Facebookimi oqalliffissatut qupperniliakkut allaqatigiiffigisinnaasaminni ataqatigiinnermik suliaq pilersitsisimavoq.
Tusarnaagassiaq Spiralkampagnen
- Danskit oqartussaasui kalaallit amerliartoqqunagit spiralilersuinissaminnut inassuteqarsimasut, DR-ip podcastimik tusarnaagassiliareqqammisaani "Spiralkampagnen"-imi erserpoq.
- 1966-ip 1970-illu akornanni spiralilersinneqartut 4.500-upput.
- Kalaallit Nunaanni arnat naartusinnaasut taamani 9000-upput.
- Aperineqaqqaaratik spiralilersinneqarsimasuni arlallit tarnikkut timikkullu kingunerlutsitserujussuarnerannik kinguneqartumik qinigassinneqarsimanngitsutut misigisimapput. Anniaatigalugulu kingunerluutigisimagaat arlallit oqarput.
- Niviarsiaqqanut ukiukitsunut, angajoqqaavi akuersiteqqaarnagit, spiralilersuineq danskit suliniuteqaleruttorneranni inatsisitigut akuerisaanngilaq.
- Taamaammat nakorsat naartunaveersaatinik niviarsiaqqanut 18-iliineqanngitsunut, angajoqqaavi akuersiteqqaarnagit, siunnersuisinnaalersillugit inatsit allanngortinneqarpoq. Tamanna nakorsat niviarsiaqqanut ukiukitsunut, angajoqqaavi akuersiteqqaarnagit, spiralileeqqusaanertut paasisimavaat.
Tusarfik: DR-podcast "Spiralkampagnen"
AAMMA ATUARUK Mimi Karlsen: Spiralilersuisimaneq pillugu qulaajaasoqarnissaa qujanaqaaq
- Ukiorparpassuarni nipangersimasimavugut, kisianni aninguisutut annertuumik angusaqarsimavugut naaggaarsinnaanermik nukissaqalersitsisumik, Naja Lyberth oqarpoq. Taanna maanna kingunerluutit pillugit immikkut ilinniarsimasutut ulluinnarni kingunerluutinut tunngasunik suliaqartuuvoq.
Piviusulersaarusiaq ullumikkut takuteqqaarneqassaaq
Tuluit Nunaanni TV-qarfik BBC spiralilersuisoqarsimanerata saqqummiunneqarnera pillugu piviusulersaarusiamik takutitseqqaassaaq, tassanilu Naja Lyberth aamma ilaavoq. Tuluit tusagassiuutaat arnanik arlalinnik aamma aperineqaqqaaratik 2000-ikkut aallartinneraniit maannakkumut spiralilertinnikut aamma oqaloqatigisimavaat.
- Tupaqqallungalu kamaqqarujussuarpunga. Tamassuma ersersippaa nammineq timitsinnut aamma meerartaarnissamut aalajangiisinnaanermut oqartussaaffitsinnut atatillugu tunngaviusumik inuit pisinnaatitaaffii suli unioqqutinneqartartut, taanna oqarpoq.
1960-ip 1991-llu, ukiormi peqqinnissaqarfiup nunatsinnit akusassaaffigineqalertoq tikillugu, akornanni spiralilersuisoqarsimanera pillugu qulaajaasoqassaqasoq Naalakkersuisut danskillu naalakkersuisuisa septembarimi isumaqatigiissutigaat.
Kalaallinik niviarsiaqqanik arnanillu taavalu Danmarkimi efterskolertunik taamanikkut spiralilersuisoqartarsimanera qulaajarneqassaaq
AAMMA ATUARUK Elisibanguak Jeremiassen om spiral-udredning: Nu føler jeg mig forstået
Spiralilersuinermi arnani eqqugaasut ilaat Arnannguaq Poulsen pillugu KNR maajimi allaaserinnippoq, Arnannguaq Bornholmimi Den Grønlandske Kostskolemi 15-inik ukioqarluni atuartuunermini spiralilerneqarpoq.
Tamassuma saniatigut arnat eqqugaasimasut oqaluttuaannik qulaajaaneq aamma imaqassaaq.
Naja Lyberthili aperigaanni ulloq manna tikillugu pisunik misissuinermi ilanngussisoqartariaqarpoq.
- Oqaluttarineqarneratigut paasissutissat nutaat pissarsiarisimasatta ersersippaat tamanna arnanut inuusuttunut kingusinnerpaamik 2018-imi 2019-imilu aamma pisimasoq. Kisitsisitai qaffasinngikkaluartut aamma tamanna qulaajarneqartariaqarpoq, taanna oqarpoq.
· Peqqinnissamut oqartussaaffik nunatta 1992-imi tiguaa.
· Inatsisartuni ilaasortat tamarmik 1966-imit 1975-imut sivisunerusumillu spiralilersuisoqarsimaneranut atatillugu qulaajaasoqarnissaanik qinnuteqarnissartik isumaqatigiissutigaat.
· Nunatsinni Inuit Pisinnaatitaaffii pillugit Siunnerusisoqatigiit aamma Inuit pisinnaatitaaffii pillugit Instituttip spiralilersuisoqarsimanera arnat inuttut pisinnaatitaaffiannik unioqqutitsinerusutut nalilerpaat.
