Elisibanguak Jeremiassen qulaajaasoqalernera pillugu: Paasineqartutut misilerpunga
Arnat niviarsiaqqallu spiralilersorneqarnikuunerat maanna qulaajaaffigineqassasoq danskit naalagaaffiata naalakkersuisullu isumaqatigiissutigaat.
Isumaqatigiissut Elisibánguak´ Jeremiassenimit tusarluarneqaqaaq.
- Nuannaajallappunga qujallungalu, ukiorpassuarni matoqqasoq ammarneqarmat.
- Qamuuna toqqissiallanneq neriuuteqarnerlu pigivakka.
Sooruna?
Tusarnaagassiaq Spiralkampagnen
- Danskit oqartussaasui kalaallit amerliartoqqunagit spiralilersuinissaminnut inassuteqarsimasut, DR-ip podcastimik tusarnaagassiliareqqammisaani erserpoq.
- 1966-ip 1975-illu akornanni kalaallit niviarsiaqqat tuusintilikkaat spiralilersinneqarput.
- 1966-ip 1970-illu akornanni spiralilersinneqartut 4.500-upput.
- Kalaallit Nunaanni arnat naartusinnaasut taamani 9000-upput.
- Aperineqaqqaaratik spiralilersinneqarsimasuni arlallit tarnikkut timikkullu kingunerlutsitserujussuarnerannik kinguneqartumik qinigassinneqarsimanngitsutut misigisimapput. Anniaatigalugulu kingunerluutigisimagaat arlallit oqarput.
- Niviarsiaqqanut ukiukitsunut, angajoqqaavi akuersiteqqaarnagit, spiralilersuineq danskit suliniuteqaleruttorneranni inatsisitigut akuerisaanngilaq. Taamaammat nakorsat naartunaveersaatinik niviarsiaqqanut 18-iliineqanngitsunut, angajoqqaavi akuersiteqqaarnagit, siunnersuisinnaalersillugit inatsit allanngortinneqarpoq. Tamanna nakorsat niviarsiaqqanut ukiukitsunut, angajoqqaavi akuersiteqqaarnagit, spiralileeqqusaanertut paasisimavaat. Tassa imaappoq, nakorsat inatsisinik unioqqutitsisimapput.
- "Spiralkampagnen" P1-ikkut maajip ulluisa arfineq-pingajuanniit tusarnaarneqarsinnaalissaaq."
Tusarfik: DR-podcast "Spiralkampagnen
- Ukiorpassuarni, ukiuni 45-ni qamuuna misigissutsikkut timikkut tarnikkullu misigiuarsimagakku meeraalluni spiraliligaaneq. Ajorami aamma annernarami.
Elisibánguak' Jeremiasssen 1975-imi 13-inik ukioqarluni spiralilertittorpassuarnut ilaavoq.
AAMMA ATUARUK Spiralilersuisoqarsimanera pillugu qulaajaasoqalersoq
Spileralilersinneqarnranit ukioq ataaseq qaangiutereersoq nakorsiarnermini misissorneqarami spiralia takussaanngimmat nutaamik spiralilerneqarpoq, taamaalilluni marlunnik spiraleqalerpoq, aappaali kingusinnerusukkut suliaritinneratigut peerneqarpoq.
- Spiralilerneqarnikuunera inuttut erloqissutigisimaqaara sulissutigiuarsimallugulu. Massakkullu pisut ingerlanneqartut aamma malinnaaffigalugit. Qujamasunnaqaaq sutigut tamatigut qaqinneqarnera, uannut toqqissiallaataavoq, Elisibánguak´ Jeremiassen oqarpoq.
Naja Lyberthip suliaq aallartikkaa
Naja Lyberth arnani spiralilersuisoqarsimaneranut suliaq pillugu oqaluttuaqqaartuuvoq.
Taassuma qulaajaasoqalerani tusaramik aamma nuannaarpoq.
Qulaajaaneq kalaallinit danskinillu immikkut ilisimasaqartunit suliarineqassaaq ukiullu marluk qaangiutsinnagit naammassineqariissalluni.
AAMMA ATUARUK Pinngitsaaliissummik spiralilerneqarsimasoq: - Soorlu savinnik illissakkut kapoorneqarlunga
- Suliap qanoq ingerlanera utaqqillugu maanna toqqissisimanerulaalersinnaalerpunga, taanna KNR-imut oqarpoq.
- Taamani susoqarnera arlaannit ilisimaneqarsimassaaq. Taamaammat suliap ingerlaqqinnissaa, qanoq pisoqarsimanerata misissorneqarsinnaalernera nuannaarutigaakka.
- Illersugaanngitsutut ittumik misigisimanikuuvunga. Amerlasuut susoqarnera ilisimasimassavaat, iliuuseqartoqarnanili – assersuutigalugu peqqinnissamik suliaqartut atuarfiillu niviarsiaqqanik nakorsamukartitsisut. Taakku attavigineqarnerammik qanorlu ilisimasaqarnerannik tusarnissaq nuannissaaq, Naja Lyberth oqarpoq.
Danmarkimi efterskolit aamma misissorneqassasut
Qulaajaanermi Kalaallit Nunaanni kalaallinut niviarsiaqqanut arnanullu, Danmarkimilu assersuutigalugu efterskolini kalaallinut ilinniartunut naammassineqarsimasunik arlaannaanilluunniit attuumassuteqanngitsumik qulaajaasoqassaaq.
Arnat spiralilerneqarnikut ilagaat Arnannguaq Poulsen, taanna 15-inik ukioqarluni Danmarkimi Bornholmimi spiralilerneqarsimasoq KNR-imiit maajimi oqaloqatigaarput. Taannalu spiralilerneqarnermi kingunerisaanik inuunermi sinnerani meerartaarsinnaajunnaarnikuulluni.
Arnalli KNR-imiit oqaloqatigisimasagut taakkuinnaanngillat aamma allanik ilaqarput. Taamaammat qulaajaanissaq pingaaruteqartoq, Elisibánguak´ Jeremiassen isumaqarpoq.
AAMMA ATUARUK Danskit peqqissutsinut ministeriat spiralilersuisoqarsimanera pillugu: Paasiuminaappoq illersorneqarsinnaananilu
- Iliuuseqartoqarnera ikorfartuutaasorujussuuvoq. Qujanaq iliuuseqartoqalermat, paasineqarluta. Uanga paasineqarlunga misigivunga. Pissutigalugu ukiorpassuarni paasineqanngitsutut inissisimanikuuvunga allaat ajornartorsiutigisarlugu kisiannili eqqartortarnagu, Elisibánguak´ Jeremiassen oqarpoq.
- Misissuinissaanut neriuuteqarneq annertuvoq toqqissiallaataassallunilu. Pisimasup iluamik qulaajarneqarnerani paasisaqartoqarnissaa neriuutigalugit.
- Peqqinnissamut oqartussaaffik nunatta 1992-imi tiguaa. Naalakkersuisut siulittaasuata, Múte B. Egedep (IA) oqarnera naapertorlugu taamaammat nunarput suliamut atatillugu ilisimasakippoq.
- Inatsisartuni ilaasortat tamarmik 1966-imit 1975-imut sivisunerusumillu spiralilersuisoqarsimaneranut atatillugu qulaajaasoqarnissaanik qinnuteqarnissartik isumaqatigiissutigaat. Kikkut qulaajaasuussanersut qanorlu suliarineqassanersoq suli aalajangiiffigineqanngilaq.
- Nunatsinni Inuit Pisinnaatitaaffii pillugit Siunnerusisoqatigiit aamma Inuit pisinnaatitaaffii pillugit Instituttip spiralilersuisoqarsimanera arnat inuttut pisinnaatitaaffiannik unioqqutitsinerusutut nalilerpaat.
