Naja Lyberth spiralilersuisoqarneraneersoq BBC-p arnanut isumassarsisitsinerpaanut 100-nut allattorsimaffiani ilaasoq
Tuluit tusagassiorfiata BBC-p arnanut nunarsuarmi tamarmeersunut isumassarsisitsinerpaanut 100-nut allattorsimaffik saqqummiuteqqammerluinnarpaa.
Kalaallinullu ateq aalajangersimasoq maluginiarneqarussagunarpoq.
Kalaalermi Naja Lyberth arnat soorlu amerikamiut popimik nipilersortartuini tusaamaneqarluartup Bille Eiliship, EU-p præsidentiata Ursula von der Leyenip, Ukrainep præsidentiata nuliata Olena Zelenskap allaffimaffiisa akornanniippoq. Naja Lyberthip spiralilersuisoqarnikuunera arnani siulliulluni ammasumik oqaluttuarinikuuaa.
AAMMA ATUARUK Mimi Karlsen: Spiralilersuisimaneq pillugu qulaajaasoqarnissaa qujanaqaaq
Tamanna isumaqangaatsiartoq, Naja Lyberth KNR-imut oqarpoq.
Tusarnaagassiaq Spiralkampagnen
- Danskit oqartussaasui kalaallit amerliartoqqunagit spiralilersuinissaminnut inassuteqarsimasut, DR-ip podcastimik tusarnaagassiliareqqammisaani erserpoq.
- 1966-ip 1975-illu akornanni kalaallit niviarsiaqqat tuusintilikkaat spiralilersinneqarput.
- 1966-ip 1970-illu akornanni spiralilersinneqartut 4.500-upput.
- Kalaallit Nunaanni arnat naartusinnaasut taamani 9000-upput.
- Aperineqaqqaaratik spiralilersinneqarsimasuni arlallit tarnikkut timikkullu kingunerlutsitserujussuarnerannik kinguneqartumik qinigassinneqarsimanngitsutut misigisimapput. Anniaatigalugulu kingunerluutigisimagaat arlallit oqarput.
- Niviarsiaqqanut ukiukitsunut, angajoqqaavi akuersiteqqaarnagit, spiralilersuineq danskit suliniuteqaleruttorneranni inatsisitigut akuerisaanngilaq. Taamaammat nakorsat naartunaveersaatinik niviarsiaqqanut 18-iliineqanngitsunut, angajoqqaavi akuersiteqqaarnagit, siunnersuisinnaalersillugit inatsit allanngortinneqarpoq. Tamanna nakorsat niviarsiaqqanut ukiukitsunut, angajoqqaavi akuersiteqqaarnagit, spiralileeqqusaanertut paasisimavaat. Tassa imaappoq, nakorsat inatsisinik unioqqutitsisimapput.
- "Spiralkampagnen" P1-ikkut maajip ulluisa arfineq-pingajuanniit tusarnaarneqarsinnaalissaaq.
Tusarfik: DR-podcast "Spiralkampagnen"
- Tulluutigaara. Piukkussineq uannuinnaq tunngasuunngilaq, ksiianni aamma arnanut allanut uattulli misigisaqarsimasunut oqaluttuaqataasunullu tunngavoq, taanna oqarpoq.
Suli kingunerlutsitsissutaasoq
Naja Lyberth ullumikkkut 60-inik ukioqarpoq, taanna 14-inik ukioqarluni akuersissuteqarani spiralilerneqarnerminik oqaluttuaqqaartuuvoq.
Taassuma tamanna DR-ip aallakaatitassiaani “Spiralkampagnen”-imi kalaallit niviarsiaqqat arnallu 1960-ikkut 70-ikkullu ingerlaneranni danskit kalaallit innuttaasut amerliartornerannik ikilisaaniarlutik periusissiaannut atatillugu spiralilersorneqarsimanerisa saqqummiunneqarnerani ilaatigut oqaluttuaraa.
Tamatuma kingorna arnanut spiralilersorneqarsimasunut Facebookikkut quppernermik aallartitseqataavoq.
- Qanoq iliuuseqarfigineqarsimanitsinnik paasinninneruvoq, Naja Lyberth oqarpoq, nangillunilu:
- Uagutsinnut amerlasuunut kingunerlutsississutaavoq, tamanna pissutigalugu sorsunnermiissimasut ersiutigisartagaannik ilagut misigisaqarput. Kisianni tamanna ilutsinni, timitsinni pisuuvoq, kingunerlutsitsinerlu tamanna ukiorpassuarni qaangerneqarsimanani.
BBC-ip spiralilersuisoqarsimanera pillugu piviusuinnik tunngaveqarluni isiginnaagassiaa arfininngorpat takuteqqaarneqassaaq.
Tusagassiorfiullu tassani Naja Lyberth kalaallillu arnat allat spiralilersuisoqarsimanera pillugu oqaloqatigai.
Oqaluttuarisaanermik qulaajaaneq kinguartinneqartoq
Spiralilersuisoqarnera nunatsinni oqallisaangaatsialerpoq. Naalakkersuisut danskillu naalakkersuisuisa nunatta Danmarkillu akornanni oqaluttuarisaanermik qulaajaasoqarnissaa isumaqatigiissutigissagaat Inatsisartuni akerliuffiunngitsumik juunimi isumaqatigiissutigineqarpoq.
Politikkikkut aalajangernerit, pisimasut atukkallu allat nunatta ineriartorneranut, inuinut taavalu Danmarkip nunattalu akornanni pissutsit qanoq innerannut sunniuteqarsimasut qulaajaanermi ukkatarineqassapput.
AAMMA ATUARUK Pinngitsaaliissummik spiralilerneqarsimasoq: - Soorlu savinnik illissakkut kapoorneqarlunga
Spiralilersuisoqarsimanera kisimiitsillugu aamma qulaajaasoqassaaq. Taanna ukiut marluk qaangiutsinnagit piareersimaneqassaaq.
Kalaallinik niviarsiaqqanik arnanillu taavalu Danmarkimi efterskolertunik taamanikkut spiralilersuisoqartarsimanera qulaajarneqassaaq.
- Peqqinnissamut oqartussaaffik nunatta 1992-imi tiguaa. Naalakkersuisut siulittaasuata, Múte B. Egedep (IA) oqarnera naapertorlugu taamaammat nunarput suliamut atatillugu ilisimasakippoq.
- Inatsisartuni ilaasortat tamarmik 1966-imit 1975-imut sivisunerusumillu spiralilersuisoqarsimaneranut atatillugu qulaajaasoqarnissaanik qinnuteqarnissartik isumaqatigiissutigaat. Kikkut qulaajaasuussanersut qanorlu suliarineqassanersoq suli aalajangiiffigineqanngilaq.
- Nunatsinni Inuit Pisinnaatitaaffii pillugit Siunnerusisoqatigiit aamma Inuit pisinnaatitaaffii pillugit Instituttip spiralilersuisoqarsimanera arnat inuttut pisinnaatitaaffiannik unioqqutitsinerusutut nalilerpaat.
