Mimi Karlsen: Spiralilersuisimaneq pillugu qulaajaasoqarnissaa qujanaqaaq
Naalakkersuisut danskillu naalagaaffiat spiralilersuisoqarsimanera pillugu qulaajaanissamik isumaqatigiissuteqarnertik tallimanngormat saqqummiuppat.
Danskit oqartussaasui kalaallit amerliartoqqunagit spiralilersuinissaminnut inassuteqarsimasut, DR-ip ”Spiralkampagnen”-imik taallugu podcastimik tusarnaagassiliareqqammisaani erserpoq.
1966-ip 1975-illu akornanni kalaallit niviarsiaqqat arnallu tuusintilikkaat spiralilersinneqarput.
AAMMA ATUARUK Spiralilersuisoqarsimanera pillugu qulaajaasoqalersoq
Peqqissutsimut naalakkersuisoq Mimi Karlsen (IA) KNR-imut ima oqarpoq:
Arlaannaanilluunniit attuumassuteqanngitsut uku qulaajassavaat:
- 1960-ikkunni aallartinneqartoq Kalaallit Nunaanni naartunaveersaartitsinermi sulinermut oqaluttuarisaanikkut ataqatigiinnera, tassunga ilanngullugu "Spiral pillugu suliaq".
- Aalajangiinerup ingerlarnga, suliniutip spiralinik naartunaveersaatinillu allanik atuilersitsinermik kinguneqarnera, tamatumani suliniutip aallartisarneranut, ingerlanneqarneranut aamma aaqqissuunneqarneranut tunngaviit suunersut.
- Qulaajaanermut pisortanit, suliniaqatigiiffinniit aamma oqartussanit attuumaassuteqartunit isumaliuutaasimasut, aalajangiunneqarsimasut iliuuserisimasallu ilaatinneqassapput.
- Kalaallit Nunaanni aamma Danmarkimi efterskolini allatsissimasunut kalaallinut niviarsiaqqanut suliniutip ingerlanneqarnera.
- Suliniut piffissami aamma kalaallit nunaanni peqqinnissaqarfinni ukioqatigiiaanullu assigiinngitsunut qanoq atulersinneqarsimanersoq qulaajarniarneqassaaq.
- Aammattaaq ilisimannittut oqaluttuaat tunngavigalugit suliniut qanoq misigineqarsimanersoq qulaajarniarneqassaaq.
- Piffissami tamatumani Kalaallit Nunaanni Danmarkimilu Kalaallit Nunaanniit efterskolertut naartunaveersaartitsinissamik periuserisimasat spiralilersuisimanerillu inatsisitigut, allaffissornikkut aamma peqqinnissakkut ilisimasat tunngaviusimasut.
- Qujanaqaaq massakkut taanna qulaajarneqassammat, tassa oqaluttuarisaanitsinni qanoq taanna ataqatigiinnersoq massakkut misissorsinnaanngussavarput, aamma ukua meeraallutik maannakkut arnat qanoq misigisaqarsimanerat iluamik misissorneqassaaq, sunarpiaruna soorlu taamaaliortoqarsimanersoq qulaajarneqarluni, Peqqissutsimut naalakkersuisoq Mimi Karlsen taama oqarpoq.
1960-imit 1991 ilanngullugu, Kalaallit Nunaata peqqinnissaqarfik pillugu suliassaqarfimmik angerlaassinissaata tungaanut oqaluttuarisaanermi ataqatigiinneq qulaajarneqassapput.
Suliaq sutigut tamatigut misissorneqassaaq
Danmarkimi naalakkersuisut misissuinissamut 6 millionit koruuninik immikkoortitsinikuupput, misissuinerullu 2024-mi oktobarimi naammassineqarnissaa pilersaarutaalluni.
- Ilisimatusarfik aallaavigalugu misissuisoqassaaq. Danmarkimi naalakkersuisut qulaajaasoqarnissaanut 6 millionit koruuninik immikkoortitsipput, aalajangiinissamullu tunngaviliissallutik, Mimi Karlsen oqarpoq.
Suliap killiffia pillugu aappaagu saqqummersinneqartussamik aamma nalunaarusiortoqassaaq.
AAMMA ATUARUK Elisibanguak Jeremiassen om spiral-udredning: Nu føler jeg mig forstået
Danmarkip peqqissutsimut ministeriata, Magnus Heunickep spiralilersuisimanerup puiguinnarneqannginnissaa aamma pingaartippaa.
- Arnat eqqorneqartut arlallit nammineerlunga naapinnikuuakka, taakkulu timikkut misigissutsitigullu anniarnerat suli ullumikkut misigisaat takuakka. Taamaattumik suliap immikkut ilisimasalinnik arlaannaanilluunniit attuumassuteqanngitsunik erseqqissumik qulaajarneqarnissaa pingaaruteqarpoq, Danmarkimi peqqissutsimut ministeri Magnus Heunicke oqarpoq.
- Inatsisartut taakkuupput suliassiisut, danskit naalagaaffiat attavigissagipput paasiniarlugulu spiralilersuisimanermut tunngasoq. Tassa taassuma inernera naluarput qanoq inerneqarumaarnersoq, kisianni tassa inatsisartut misissuisitsiniartuummata misissuinerup inernera inatsisartunut tunniunneqassaaq, tassanngaanniillu soorunami aallaaviujumaarpoq sumulluunniit aalajangiinissamut, peqqissutsimut naalakkersuisoq Mimi Karlsen KNR-imut oqarpoq.
