Naggueqatigiit inuit eqqumiitsuliaat ilisimatusarfiit avannarpasinnerpaartaanni: Tulluusimaartitsivoq
![](/sites/default/files/styles/image_934x467/public/article_images/315526479_5562169780568562_5069450889758590628_n.jpg?itok=rfly9hUZ)
Nunarsuarmi ilisimatuutut misissuivik avannarpasinnerpaaq, Canadian High Arctic Research Station ilisimasanik kisimi ulikkaanngilaq – eqqumiitsulianik aamma ulikkaarpoq.
Illorsuaq eqqumiitsulianik ulikkaarpoq, tamanna Nuummi Ilisimatusarfimmi maanna saqqummersinneqarpoq. Eqqumiitsuliat tamarmik naggueqatigiinnit inunnit tunuliaqutaqartunit suliaapput.
Eqqumiitsulianik saqqummersitsinermi aaqqissuussisup, Isabelle Laurierip eqqumiitsuliat nassuiaatigai.
- Naggueqatigiit inuit eqqumiitsuliaat illuliortariaatsiami atoraanni kulturi ersarinnerulertarpoq. Naggueqatigiit inuit eqqumiitsuliaat illorsuup ilaaniinnera tulluusimaarnermik pilersitsisarpoq, Isabelle Laurier oqarpoq.
Naggueqatigiit inuit takutinneqartut
Eqqumiitsuliat ilisimatuutut misissuiviup saani, iigaani natiinilu ilaapput – Isabelle Laurierillu tamanna maanna nassuiaatigaa.
![](/sites/default/files/styles/image_934x467/public/article_images/316106728_447518407460792_1994962145964226194_n.jpg?itok=RADvttJm)
Eqqumiitsuliami tivasut iloqqasunngorsimasut qeqqani tivasoq takusineqarsinnaavoq, taannalu ilisimatuutut misissuiviup natitaata ilarujussuani pinnersaataavoq.
Naggueqatigiimmi kulturiata illussap titartarnerata ilaaniinnissaa pingaaruteqartoq, Canadian High Arctic Research Stationip illutassaanik titartaasoq, Alain Forunier nassuiaavoq.
- Eqqumiitsuliat ilisimatuutut misisisuiviup oqaluttuassartaata ilaanut pingaaruteqarluinnarpoq. Eqqumiitsuliat illorsuup uuma naggueqatigiit inuit inuiaqatigiivinni Iqaluktuttianiinneranut kiisalu illorsuup naggueqatigiinnik inunnik takussutissiineranut atatillugu pingaaruteqarpoq, Alain Forunier oqarpoq.
Saqqummersitsineq angalatitaq
Eqqumiitsuliortut arfineq-marluk eqqumiitsuliortunut naggueqatigiinnik inunnik tunuliaqutaqartunut unammisitsineq tunuliaqutaralugu toqqarneqarnikuupput. Eqqumiitsuliamillu illussamik titartaanermi ilaatitsineq ajornaatsuinnaanngikkaluartoq tamatuma inernera illussamik titartaasup nuannaarutigaa.
- Suliarujussuuvoq, ilungersuutigineralu nalissaqarluarpoq
Saqqummersitsineq siullermik 2019-imi saqqummersinneqarpoq, tamannalu ilaatigut Dubai-imi, Islandimi saqqummersinneqarnikuuvoq, maannalu Nuummi Ilisimatusarfimmi januaarip qiteqqunnerata tungaanut saqqummersinneqarpoq.