Naalakkersuisut tunngaviusumik inatsisissatut siunnersuut pillugu pilersaarut qulakkeertussanngoraat

Naalakkersuisut tunngaviusumik inatsisissamut siunnersuutip apriilimilu uninngatiinnarneqarsimasup siammasinnerusumik qanoq oqallisigineqarsinnaanera pilersaarusiussavaat.

Tamanna Inatsisartuni amerlanerussuteqartut ukiakkut ataatsimiinnermi marlunngornermi aalajangerpaat.

Naalagaaffinngornissamut nunanullu allanut naalakkersuisup, Vivian Motzfeldtip (S) oqarnera naapertorlugu tunngaviusumik inatsisissatut siunnersuut naalagaaffinngornissamut alloriarneruvoq pingaaruteqartoq.

- Innuttaasut tamarmik ilanngutitinneqarnissaat naalakkersuisunut pingaaruteqarpoq, Vivian Motzfeldt oqarpoq.

Pilersaarut piaartumik piareerneqarlunilu Inatsisartuni inatsiseqarnermut ataatsimiititaliamut upernaaq 2024-mi ataatsimiinnermi saqqummiunneqassaaq.

IA-p Siumullu tunngaviusumik inatsisiliornermut pilersaarusiortoqarnissaa Inatsisartunut siunnersuutigereeraallu taama aalajangiisoqarpoq.

Partiit marluullutik innuttaasut ilanngutitinneqarnissaannik qulakkeerinissamut ukiunut marlunnut 4 millionit koruunit atorneqarnissaat missiliorpaat.

- Inuiaqatigiinni paasititsiniaanerit, oqallitsitsinerit aammalu ataatsimoortumik innuttaasunut ataatsimiititsinerit avataatigut ilinniartoqarfinnit, soqutigisaqaqatigiinnit aammalu kattuffinnik naapititsinerit ingerlanneqarnissaat naatsorsuutigaagut, Vivian Motzfeldt oqarpoq.

Tamatuma saniatigut tunngaviusumik inatsisissatut siunnersuut innuttaasunut agguaanneqartussamik paasiuminartunngorlugu allanneqarnissaa Siumup kissaatigaa. Suliaq taanna aallartereerpoq. Tamanna naalagaaffinngornissamut naalakkersuisup, Vivian Motzfeldtip (S) KNR-imut qaammatip siuliani oqaatigaa.

Naalagaaffinngornissamut qanillinngilagut

Illuatungiliuttut nunatsinni partiit annerpaanit marlunnit suliniut qiimmatsaatigivallanngilaat. Killormuuanilli.

Demokraatit Inatsisartut tunngaviusumik inatsisissamut siunnersuutip suliareqqinneqarnissaanut aalajangiinissaat akerleraa, Nalerarlu taasinani.

Demokraatit oqarnerat naapertorlugu tunngaviusumik inatsisissamut aningaasartuuteqartoqaqqissanngitsoq oqaatigaat, partiip siulittaasuata taanna ”iluareqqusaaginnarluni takorluugaannaanerarpaa”.

- Uagut isumaqanngilagut una tunngaviusoq inatsit taanna namminiilivinnissamut qanillisikkaatigut. Taamaammat akerliugaluarpugut. Tassa oqarnittuut aningaasat atorneqaqqittariaqanngikkaluarput uumunnga, isumaqarpunga kukkunerusoq aamma politikkikkulluunniit imarisaa suli eqqartorneqarnikuunngilaq, taamaammat tulleriiaarineq kukkuvoq, aningaasat atorneqarnikut amerlavallaat atorneqareerput, aamma namminiilivinnissamut qanillisikkunnanngilaatigut, Jens-Frederik Nielsen oqarpoq.

Naleqqamit Pele Brobergip tunngaviusumik inatsisissamut siunnersuummi paragraffit 49-nit 25-nut unnummi ataatsimi kilisippai. Naleqqallu tassunga atatillugu Naleqqap nutarterilluni naalisaanera tusarniaassutigineqassasoq innuttaasunullu oqallisigineqarnissamut periarfissiissutigineqassasoq allannguutissatut siunnersuutigaa. Inatsisartullu innuttaasut taasissutissaannik ukiakkut ataatsimiinnermi aalajangiissasut siunnersuutigaa.

Siunnersuut ilisimaneqartutut itigartitsissutigineqarpoq.

Naalagaaffinngornissamut neriorsuutit oqaluartaarutaasut

Atassutip innuttaasut taasitinneqarnissaat aamma piumasaraat – kisianni Naleqqamit allaanerusumik maannakkut tunngaviusumik inatsisissamut siunnersuutip suliareqqilinnginnerani innuttaasut naalagaaffinngornissamut taasitinneqassasut Atassut isumaqarpoq.

- Atassummiit qatsupparput qinersinerit tamarluinnaasa Naalagaaffinngorniarneq neqitarineqartuartoq, neriorsuutigineqartuartoq, oqarluartaarutaannanngoqqasorlu.

- Atassummiit nunarput tamakkerlugu suaarutigilarput! Tunngaviusumik inatsisissap inaarsannginnerani Naalagaaffinngornissaq pillugu innuttaasut taasitinneqarlik, partiip siulittaasua, Aqqalu Jerimiassen oqaaseqaammi allappoq.

Vivian Motzfeldilli isornartorsiuineq akuerinngilaa.

- Suliap aallartinneraninngaanniit partiit tamarmik peqataatitaqarnissaminnut periarfissaqarnikuupput. Aammalu partiit aallartinnerani naanissaata tungaanut peqataasimasut suliap taama nalikitsigisunngorlugu oqaasertalersornera tulluartutut isiginngilara, taanna oqarpoq.