Naalakkersuisut Tasiilamut iliuusissatut pilersaarusiornissamut siunnersuut itigartitsissutigigaat

- Tasiilaq ajornartorsiutitut isigineqarani periarfissatut isigineqassaaq.

Siunnersuuteqartoq, Gerth Mikaelsen (N) Inatsisartut taassuma Tasiilami eqqaanilu iliuusissatut pilersaarusiornissamut siunnersuutaanik marlunngornermi aappassaaneerinninneranni oqarpoq.

Iliuusissatut pilersaarutip suliffissaaleqisunik ikilisaanissaq, suliffissanik qulakkeerinissaq kiisalu pilersuinerup isumannaatsuuneranik qulakkeerinissaq siunertaraa.

Siunnersuut Inuussutissarsiornermut Aatsitassanullu Ataatsimiititaliamut IA-mit, Demokraatinit, Atassummit Naleqqamiillu inuttaqartumut suliarineqaqqitassanngortinneqarpoq.

Naalakkersuisoqatigiit partiivisa allannguutissatut siunnersuut ima oqaasertaqartoq inassutigaat:

- Naalakkersuisut suliniutit pioreersut nukittorsarlugillu erseqqissassagaat, kiisalu Inatsisartut ataavartumik suliniutit suunerannik taakkulu sunniutaannik ingerlaavartumik ilisimatinneqartarnissaat.

Siunnersuutip aappassaaneerneqarnerani allannguutissatut siunnersuut 16-init akuerineqarpoq. Arfineq-marluk itigartitsipput marlullu taasinatik.

Illuatungiliuttut partiivi Siumut Nalerarlu taasisoqannginnerani Tunumi pissutsit ilungersunarnerat pillugu oqaaseqarput.

Allannguutissatut siunnersuut isornartorsiorneqartoq

Inuit Ataqatigiinneersup Kristian Jeremiassenip, partiip Tasiilami ineriartortitsisoqarnissaanik kissaateqarnera, oqaluttarfimmiit oqaatigaa. 

Partiilli, iliuusissatut pilersaarummut siunnersuutigineqarsimasumut isumaqataanngikkaluarluni, naalakkersuisut allannguutissatut siunnersuutaat naaperiaassutigineqarsinnaanerarpaa. 

- Siunnersuuteqartup siunnersuutaani siunertarineqartoq IA-mit paasivarput. Tamanna IA-mut pingaaruteqarpoq. Suliniuteqartoqartariaqarpoq. Isumaqatigiinniarsinnaasariaqarpugulli.

Kristian Jeremiassenip (IA) Inuit Ataqatigiit Tasiilami iliuuseqartoqartariaqarneranut isumaqataasut oqaatigaa: - Pissutsit taamaatsiinnarsinnaanngilagut. Annertuunik iliuuseqartoqartariaqarpoq suliniuteqartoqartariaqarlunilu. Assi © : KNR

Siumumeersumilli Lars Poulsenimit isornartorsiorneqangaatsiarpoq. 

- Naaperiaaniarluni oqaraanni affaannarmik aaqqiissutissarsisoqassaaq. Isummamik aalajangiusimanissaq pingaaruteqarpoq. Isumaqarpugut siunertarineqarsimasut anguniarneqarsimanngitsut.  

- Tunumi Tasiilamilu pissutsit ilungersunarput. Kisianni iliuuseqartoqaqqinnanilu pitsanngorsaasoqanngilaq.

Lars Poulsenip (S) politikerit Tunumi pissutsinut iliuuseqarnissaminnik akerliussutsimik takutitsisoqartillugu oqaluinnannginnissaat siunnersuutip aappassaarneqarnerani oqaatigaa.&nbsp;<br>Tigussaasumik iliuuseqartassapput. Assi © : Sikkersoq Rosing Karlsen

Aki-Matilda Høegh-Damillu (N) oqaasertaliinerit oqaaseqarfigai.

- Kiaana tunngavilersuutaa isumaqatigiissutiginiarneqartoq - siunnersuuteqartup imaluunniit naalakkersuisut? 

Illuatungiliuttut ataatsimoortut

Lars Poulsen, Jens Napãtôk (N) aamma Gerth Mikaelsen Tunumi ajornartorsiutit oqaluttarfimmit oqaluuseraat. 

Tamarmik Tunuminngaanneerput. Tamarmik akerliussutsimik takutitsinerit Tunumilu innuttaasut nilliaataat taakkartorpaat.

Gerth Mikaelsenip Tunu oqaatsitigut piorsarsimassutsikkullu Kitaanit allaanerunera tunngavilersuutigaa.

Suliffissaaleqinerup pilersuinerullu tungaatigut ajornartorsiuteqartoqaqimmat, naalakkersuisut isorliunerusunut iliussissatut 2050-ip tungaanut pilersaarusiamut innersuussinerat naammassorinngilaa.

- Naalakkersuisut inuusuttunut suliniutissat, iliuusissatut periusissiat piginnaasanillu ineriartortitsinissaq oqaluuseraat.
Innuttaasulli ullutsinni suliffissaaleqipput, Gerth Mikaelsen oqarpoq.

- Naalakkersuisut nuannersumik oqaluinnarnatik iliuuseqarnissaat neriuutigaara.