Arnat 67-it tamarmik immikkut 300.000 koruuninik, inuttut pisinnaatitaaffimminnik Danmarkip naalagaaffiata unioqqutitsilluni  spiraliliisimaneranut atatillugu taarsiiffigeqqupput.

Taama inatsisileritooq sulisitaat Mads Pramming Ehmer Pramming Advokater-ineersoq sapaammi KNR-imut ilisimatitsivoq. Katillugit 20,1 millioni koruunit piumasarineqarput.

Taarsiiffigitinnissamik piumasaqaat Naalakkersuisut Namminersorlutik Oqartussat allaffeqarfissuani Nuummiittumiittut illersorpaat.

- Tassa taakkua siullermik misiginneqatigeqaakka taamatut nalaassisimasut, assorsuaq misiginneqatigivakka.

- Pisinnaasarput uagut imaappoq, ikiuunnissatsinnut aqqutaasinnaasoq paasissutissat suugaluarnersut nakorsaqarfimmiit tamaasa pisariaqartinneqartut uagut soorunami tunniutissavagut, peqqissutsimut naalakkersuisoq Agathe Fontain (IA) oqarpoq.

Danmarkimi nunamut namminermut peqqissutsimullu ministeri Sophie Løhde (V) taarsiiffigineqarnissamik piumasaqaammut danskit oqartussat qanoq isumaqarnerat pillugu apersorneqarusunngilaq. Taamaattumik allakkanik nassiussivoq:

- Pisimasunik suliaq assorsuaq alianarpoq, arnallu oqaluttuaat assut attortinnarput. Susoqarsimanerata qulaajarnissaa pingaaruteqarpoq, taamaattumik ilisimatusartut eqimattat sumulluunniit attuumassuteqanngitsut maanna qulaajaallutik aallartereerput.

Misissuinermi isumalioqatigiissitat aallarteriigaat nunatsinni Naalakkersuisut aamma danskit naalakkersuisuisa pilersitaaraat. Qulaajaanerup inernera 2025-imi tunniunneqassaaq.

Qulaajaaneq utaqqinianngikkaat

Naalakkersuisut taarsiiffigitinnissamik piumasaqaat tapersersorlugu, arnat eqqugaasut paasissutissat piumasaat tamaasa Nakorsaaneqarfiup isumagiumaarai neriorsuivugut, Agathe Fontain oqarpoq.

Qulaajaaneq naammassiitinnagu allamik iliorsinnaanatik aamma isumaqarpoq.

Agathe Fontain, taarsiiffigineqarnissamik piumasaqaat danskit naalakkersuisuisa  akuerissagaat naalakkersuisuniit piumasariniarpisiuk?

• Siullermik suliaq naammasseqqaartariaqarpoq. Taavalu aatsaat tunngavissaqalertoqarsinnaagami eqqartorneqarsinnaaneranut. Tassanngaanniit aatsaat Naalakkersuisuni suliarineqaqqissinnaavoq, Agathe Fontain oqarpoq.

Naja Lyberth, arnat spiralilersugaasut sinnerlugit oqaaseqartartup oqarnera naapertorlugu, inuit pineqartut qulaajaanerup naammassinissaanut utaqqisinnaanngillat. Arnat spiralilersukkat utoqqaanersaat ullumikkut 80-it missaannik ukioqarput. Taamaammat maannangaaq iliuuseqarnissaq piffissanngorpoq, oqarpoq.

- Taarsiiffigineqarnissamut piumasaqaaterput – naalliuuteqarnitsinnut tunngatillugu – taartisiaassaaq. Timikkut tarnikkullu kingunerluuteqarpugut. Ilattami amerlasuut ikkussiffigitinneq naalliutsitsinertut misigaat, KNR-imut sapaammi oqaluttuarpoq.

Kalaallit Nunaata oqaluttuarisaanerani sisamassaa taarsiiffigitinnissamik Danmarkimi oqartussanut piumasaqartoqarpoq.