Naalakkersuisut siulittaasuat: Naalakkersuisoqarfimmi ilinniarfimmilu kukkusoqarpoq
- Uggornaqaaq, kisianni inatsisit malinneqartussaapput.
Naalakkersuisut siulittaasuat, Kim Kielsen (S) Nuummi Niuernermik Ilinniarfiup Ilinniartitaanermut Naalakkersuisoqarfiullu akornanni kukkuluttortoqarsimanera pillugu oqarpoq.
NI Nuummi bachelorinngorniarfinni marlunni siorna aggustimi ilinnialertussaagaluit aqqaneq-marluupput.
Ilinniakkalli taakkua marluk taamaatinneqarput.
Ilinniakkammi taakkua aningaasaliiffigineqarsimanngitsut akuerineqarsimanngitsullu paasinarsivoq.
NI Nuuk aamma Ilinniartitaanermut Naalakkersuisoqarfik taama pisoqarneranut akisussaannginnerarput.
Naalakkersuisoqarfiup NI akisussaatippaat. Naalakkersuisoqarfiup NI ilinniakkat taakkua marluk akuerineqarnissaannik qulakkeerinnissimannginnerarpaa.
NI-mili siulersuisut akisussaaffik naalakkersuisoqarfimmut ingerlateqqippaa. Nuummi NI-p naalakkersuisoqarfik ilinniakkat taakkua aningaasaliiffigineqarnissaat aningaasanut inatsimmut inissiisimanngimmat aningaasaliiffigineqarsimannginnerannut pisuutippaa.
NI-lli ilinniakkanik nutaanik taakkuninnga pilersitsinnginnermini naalakkersuisoqarfik taakkununnga aningaasaliisimaneranik qulakkeereqqaartussaasimagaluarnini nassuerutigaa.
Kukkuluttornerit NI Nuummi aamma Ilinniartitaanermut Naalakkersuisoqarfimmi pisimasut, eqqartuussissuserisoq misissuinermini inerniliivoq.
Nuummi Niuernernermik Ilinniarfiup ilinniakkat marluk 2019-imi upernaakkut pilersikkaluarpai. Ilinniartitaanermulli Naalakkersuisoqarfik Inatsisartulluunniit ilinniakkanut akuersisimanatillu aningaasaliisimanngillat.
Tamanna pissutigalugu ilinniakkat - ilinnialerniaraluartullu aqqaneq-marluk allartissinnaanngillat.
AAMMA ATUARUK NI-mi kukkuluttornerup misissuiffigineqarnera naammassisoq 1,5 millionit koruuninik akeqartoq
Eqqartuussissuserisumut misissuisitsisoqarpoq. Misissuinermilu "suliamik isumaginninnermi kukkusoqarsimanera" inerniliissutigineqarpoq. Naalakkersuisoqarfik Niuernermik Ilinniarfillu tamarmik kukkusimapput - taamalu pisoqaqqissanngilaq.
Eqqartuussissuserisup misissuinera 1.576.208,16 koruuninik akeqarpoq.
Illuatungeriit tamarmik kukkusut
Naalakkersuisut siulittaasuata naalakkersuisoqarfiata suliaq tusagassiuutitigut siorna aggustimi saqqummereersorli eqqartuussissuserisumut misissuisitsisuuvoq.
Naalakkersuisullu siulittaasuata, Kim Kielsenip (Siumut) eqqartuussissuserisup inerniliissutaa isumaqatigaa.
- Kukkuluttortoqarsimasoq misissuinerup takutippaa, aamma Niuernermik Ilinniarfiup siulersuisui kukkuluttorsimapput, aamma maani sulisut kukkuluttorsimapput, naalakkersuisoq siusinnerusukkut nalunaarfigineqartussaagaluarpoq, Kim Kielsen, KNR-imut oqarpoq.
AAMMA ATUARUK Ilinniartut aqqaneq marluk pakatsingaatsiartut: Ilinniarfissaat nutaat taamaatiinnarneqartut
Ilinniartitaanermut naalakkersuisoqarfiup Niuernermik Ilinniarfimmit ilinniakkanik marlunnik neqerooruteqartoqarneranik paasisaqarneranit taamani naalakkersuisuumut, Ane Lone Baggerimut ilisimatitsisoqarnissaanut qaammatit marluk ingerlaqqaarput.¨
Tamannalu kukkunerusoq, Kim Kielsenip erseqqissaatigaa.
Malittarisassat naqitatut angisuutut
Inatsisartut ilinniartitaanermut ataatsimiititaliaani ilaasortat marluk pisumut kinguneqartitsisoqarnissaa maanna piumasaraat. ”Arlaannik” soraarsitsisoqassasoq, Doris Jensen (S) isumaqarpoq.
Kim Kielsenip suliaq naalakkersuisut sinneranit isummerfigineqarnissaa neriorsuutigaa – atorfilittalli pineqartut soraarsinneqassanersut atorfimmulluunnit allamut nuutsinneqassanersut allatulluunniit pineqassanersut oqaatigiumanngilaa.
AAMMA ATUARUK Ataatsimiititaliami ilaasortat NI-mi kukkuluttortoqarnera pillugu: Kinguneqartitsisoqassaaq
Naalakkersuisoqarfinnili suleriaatsinik malitassanik pioreersunik ersarissaasoqassaaq:
- Naqitatut angisuunngorlugu: Aningaasartaqanngitsumik suliassanik aallartitsisoqarsinnaanngilaq, Kim Kielsen oqarpoq.
KNR-ip Niuernermik Ilinniarfik NI Nuuk qasseeriarluni oqaaseqartinniaraluarpaa, iluatsissimanngilarli.