NI-mi kukkuluttornerup misissuiffigineqarnera naammassisoq 1,5 millionit koruuninik akeqartoq
Sulianik ingerlatsinermi kukkuluttorneq tamatumanilu kinguneqartitsinnginneq. Taamatulli pisoqaqqissanngilaq.
Misissuititsinermut aningaasartuutit: 1.576.208,16 koruunit.
Nuummi Niuernermik Ilinniarfimmi (NI) kukkuluttornerujussuup eqqartuussissuserisumut misissugassanngortinneqarnera taama akeqarlunilu taama inernilerneqarpoq.
NI Nuummi bachelorinngorniarfinni marlunni siorna aggustimi ilinnialertussaagaluit aqqaneq-marluupput.
Ilinniakkalli taakkua marluk taamaatinneqarput.
Ilinniakkammi taakkua aningaasaliiffigineqarsimanngitsut akuerineqarsimanngitsullu paasinarsivoq.
NI Nuuk aamma Ilinniartitaanermut Naalakkersuisoqarfik taama pisoqarneranut akisussaannginnerarput.
Naalakkersuisoqarfiup NI akisussaatippaat. Naalakkersuisoqarfiup NI ilinniakkat taakkua marluk akuerineqarnissaannik qulakkeerinnissimannginnerarpaa.
NI-mili siulersuisut akisussaaffik naalakkersuisoqarfimmut ingerlateqqippaa. Nuummi NI-p naalakkersuisoqarfik ilinniakkat taakkua aningaasaliiffigineqarnissaat aningaasanut inatsimmut inissiisimanngimmat aningaasaliiffigineqarsimannginnerannut pisuutippaa.
NI-lli ilinniakkanik nutaanik taakkuninnga pilersitsinnginnermini naalakkersuisoqarfik taakkununnga aningaasaliisimaneranik qulakkeereqqaartussaasimagaluarnini nassuerutigaa.
Kukkuluttornerit NI Nuummi aamma Ilinniartitaanermut Naalakkersuisoqarfimmi pisimasut, eqqartuussissuserisoq misissuinermini inerniliivoq.
Nuummi NI-p bachelorinngorniarfiit nutaat marluk 2019-imi upernaakkut pilersippai, ilinniakkanilu taakkunani siorna aggustimi aallartittoqartussaagaluarpoq. Ilinniakkat taamaatinneqartut tassaapput, nunat tamat akornanni niuernermik bachelorinngorniarfik aamma aningaasaqarnermik nukissatigullu sillimmatinik aqutsinermik bachelorinngorniarfik.
Ilinniakkanik taakkuninnga aallartitsisussaagaluit aqqaneq-marluupput.
Taakkuali ilinniakkamik aallartitsinissaminnut akuerineqareersullu Nuummi NI ilinniakkanik taakkuninnga ”aallartitsinissaminut atortussatigut aningaasaliissutitigulluunniit akuerisaasunik tungavissaqanngitsoq” paasinarsivoq.
AAMMA ATUARUK Ilinniartut aqqaneq marluk pakatsingaatsiartut: Ilinniarfissaat nutaat taamaatiinnarneqartut
Tassa imaappoq, NI ilinniakkanut taakkuninnga aallartitsinissaminut atortussatigut aningaasaliissutitigulluunniit akuerisaasunik tunngavissaqarsimanngilaq.
Ilinniakkammi taakkua aningaasaliiffigineqarnissaat 2019-imi aningaasanut inatsimmi inissinneqarsimanngitsut erserpoq.
Ilinnialertussaagaluit pakatsisut
Ilinnialertussaagaluillu aqqaneq-marluk pakatsipput – ilinniakkamimmi qinnuteqarfigisimasaminnik aallartitsinissaraluat taamaatinneqarmat.
Taamaammat tamanna misissuiffigineqassasoq, Naalakkersuisut siorna septembarip ulluisa 25-anni aalajangerput. Eqqartuussissuserisoq misissuilluni aallartippoq - misissuininilu maanna naammassillugu. Tamannalu 1,5 millionot koruuninik akeqarpoq.
AAMMA ATUARUK Alexander ilinniarluni aallartittussaagaluarpoq: Pakatseqaanga
Eqqartuussissuserisoq Ole Spiermann misissuisuuvoq, ilinniakkanillu taakkuninnga pilersitsineq taassuma oqarnera naapertorlugu qularnanngitsumik kukkuluttorneruvoq. Tamannali ima pisoqarneranik kinguneqartumik kukkuluttornerujussuartut taaneqarsinnaanera qularnaatsoq, misissuinermi inernilerneqarpoq:
”Naalakkersuisut inuussutissarsiornermut ilinniakkanut inatsisikkut akisussaatitsisinnaanatillu qisuariarnissamik tunngavissaqanngitsut, aamma siulersuisut siulittaasuannut", tusagassiutinut nalunaarummi allaqqavoq.
Qaammatit marluk qaangiummata paasineqartoq
Bachelorinngorniarfiit taakkuninnga ”aallartitsinissaminut atortussatigut aningaasaliissutitigulluunniit akuerisaasunik tungavissaqarani” pilersinneqarsimasut taakkununngalu aningaasaliissuteqartoqarsimanngitsoq, pilersinneqarneranniit qaammatit marlungajaat qaangiutereersullu Ilinniartitaanermut Naalakkersuisoqarfiup paasisimagaa - naalakkersuisuusimasullu Ane Lone Baggerip tamanna naalakkersuisoqarfimmut ilisimatitsissutigisimagaa, tusagassiutinut nalunaarummi aamma allaqqavoq.
- Naliliinera malillugu ilisimatitsissuteqarneq siusinnerujussuakkut pisimasussaagaluarpoq. Tassani suliassanik suliarinninnermi kukkusoqarsimavoq. Naliliinera malillugu suliassanik suliarinninnermi kukkuneq IKIN-imi sulisunut akisussaatitsisoqarnissaanut pineqaatissiisoqarnissaanullu tunngavilersuutaasinnaasumik, annertuutut isigineqanngilaq, eqqartuussissuserisoq oqarpoq.
- Peqatigisaanik oqaatigisinnaavara pisup ingerlasimanera Naalakkersuisumut Ane Lone Baggerimut (taassumaluunniit siuliinut) nalilersuinissamik isumaliutersuuteqarnissamut pissutissaqalersitsisimanngitsoq, eqqartuussissuserisoq tunngavilersuivoq.
Ane Lone Bagger juulip ulluisa 31-anni naalakkersuisuujunnaarpoq.
Eqqartuussissuserisut misissuineranni inerniliinerit tusaatissatut tiguneqassasut, Naalakkersuisut 2020-mi aggustip ulluisa 13-ianni ataatsimiinnerminni aalajangerput. Kukkunerit tassunga assingusut pisassanngitsut, Naalakkersuisut ilinniartitaanermut naalakkersuisoqarfiani atorfilittanut tamatuma saniatigut erseqqissarpaat.
