Ataatsimiititaliami ilaasortat NI-mi kukkuluttortoqarnera pillugu: Kinguneqartitsisoqassaaq
- Upperisariaqarparput tatigisariaqarlugulu naalakkersuisoqarfik sunaagaluarpalluunniit inatsisit maleruagassallu malillugit ingerlassasut.
Inatsisartut ilinniartitaanermut ataatsimiititaliaani Inuit Ataqatigiinnit ilaasortaq, Sofia Geisler oqarpoq.
AAMMA ATUARUK NI-mi kukkuluttornerup misissuiffigineqarnera naammassisoq 1,5 millionit koruuninik akeqartoq
Nuummi Niuernernermik Ilinniarfiup ilinniakkat marluk 2019-imi upernaakkut pilersikkaluarpai. Ilinniartitaanermulli Naalakkersuisoqarfik Inatsisartulluunniit ilinniakkanut akuersisimanatillu aningaasaliisimanngillat. Tamanna pissutigalugu ilinniakkat - ilinnialerniaraluartullu aqqaneq-marluk allartissinnaanngillat.
Suliaq pillugu eqikkaaneq
NI Nuummi bachelorinngorniarfinni marlunni siorna aggustimi ilinnialertussaagaluit aqqaneq-marluupput.
Ilinniakkalli taakkua marluk taamaatinneqarput.
Ilinniakkammi taakkua aningaasaliiffigineqarsimanngitsut akuerineqarsimanngitsullu paasinarsivoq.
NI Nuuk aamma Ilinniartitaanermut Naalakkersuisoqarfik taama pisoqarneranut akisussaannginnerarput.
Naalakkersuisoqarfiup NI akisussaatippaat. Naalakkersuisoqarfiup NI ilinniakkat taakkua marluk akuerineqarnissaannik qulakkeerinnissimannginnerarpaa.
NI-mili siulersuisut akisussaaffik naalakkersuisoqarfimmut ingerlateqqippaa. Nuummi NI-p naalakkersuisoqarfik ilinniakkat taakkua aningaasaliiffigineqarnissaat aningaasanut inatsimmut inissiisimanngimmat aningaasaliiffigineqarsimannginnerannut pisuutippaa.
NI-lli ilinniakkanik nutaanik taakkuninnga pilersitsinnginnermini naalakkersuisoqarfik taakkununnga aningaasaliisimaneranik qulakkeereqqaartussaasimagaluarnini nassuerutigaa.
Kukkuluttornerit NI Nuummi aamma Ilinniartitaanermut Naalakkersuisoqarfimmi pisimasut, eqqartuussissuserisoq misissuinermini inerniliivoq.
Eqqartuussissuserisup, Ole Spiermannip suliaq maanna misissuiffigereerpaa. Taassumalu "suliamik isumaginninnermi kukkusoqarsimanera" inerniliissutigaa. Naalakkersuisoqarfik Niuernermik Ilinniarfillu tamarmik kukkusimapput - taamalu pisoqaqqissanngilaq.
Eqqartuussissuserisup misissuinera 1.576.208,16 koruuninik akeqarpoq, eqqartuussissuserisullu inerniliinera tunngavigalugu Naalakkersuisuisut tusaatissatut tigusipput.
Tamannali Inuit Ataqatigiinnit Sofia Geislerip naammaginngilaa, suliamilu kinguneqartitsisoqarnissaa kissaatigalugu.
- Taamaattoqarsimanngippat soorunami kinguneqartinneqartariaqarpoq, qanorlu kinguneqartitsisoqassanersoq Naalakkersuisut ilumut piumagunikku oqaatigisariaqarpaat tusaatissatut tiguinnarnagu, Sofia Geisler (IA) oqarpoq.
Taassuma oqarnera Siumup ilinniartitaanermut ataatsimiititaliami ilaasortaatitaanit isumaqatigineqarpoq.
- Taamatut pisoqaqqinnginnissaa eqqarsaatingalugu iliuuseqartoqartariaqarpoq, tassa atorfimmik kinguneqartitsilluni, Doris J. Jensen oqarpoq.
Demokraatit: Nutaanik akisussaasoqalernikuuvoq
Ataatsimiititaliami siulittaasup Nivi Olsenip kinguneqartitsinissaq qanoq ittuussanersoq nalileruminaatsippaa, kukkuluttornerup nalaani akisussaasuusut maanna akisussaaffitsik qimareermassuk.
Ilinniartitaanermut naalakkersuisoq aamma allanngornikuuvoq - Ane Lone Bagger (S) ilinniartitaanermut politikkikkut siorna akisussaasuuvoq, Karl Frederik Danielsen (S) atuuffimmi tassani maanna taartaagallarpoq.
- Kukkusoqarsimanerarnut akisussaaffimmik soorunalimi tunniusserusunnarpoq. Kisianni una eqqumaffiginiarpara, piffissaq ingerlalertorsimavoq Naalakkersuisut nikinnikuupput sulisimasullu nikerarnikuullutik, Nivi Olsen oqarpoq.
AAMMA ATUARUK Ilinniartut aqqaneq marluk pakatsingaatsiartut: Ilinniarfissaat nutaat taamaatiinnarneqartut
Ilinniartitaanermut naalakkersuisoqarfimmi pisortap, Karsten Peter Jensenip, inatsisilerituup misissuinera tusaatissatut tiguaa, taamaannallu pisoqaqqeqqunagu maanna sulillutik, KNR-imut allakkatigut akissuteqarnermini allappoq.
- Ilinnakkanik akuersisarnernut atatillugu qitiusumik allafeqarfiup ilinniarfeqarfiillu akornanni attaveqatigiinneq sulinerlu nukittorsarniarlugit, tamatumunngalu atatillugu ilinniarfeqaarfiit akuerineqaqqaarani atortusaqaranilu ilinniakkamik neqerooruteqartannginnissaat qulakkeerniarlugu, suliat allartinneqarput, Karsten Peter Jensen allappoq.
Ilinniarfiup pisortaa, siulersuisunilu siulittaasoq KNR-imit oqaaseqartinniaraluarpagut sulinngiffeqarmatali apersorsinnaanagit.
