Naalakkersuisut siulittaasuat Bentiaraq Ottosen tunuarmat: Naalakkersuisoqatiginneq allanngussanngilaq

Isumaginninnermut, Suliffeqarnermut, Nunamullu Namminermut Avatangiisinullu Naalakkersuisoq, Bentiaraq Ottosen (A), naalakkersuisutut ullumi tunuarniuteqarpoq.

- Isumaqarpunga akisussaaffimmik tigusillunga, aamma maannakkut nalunaarutigissavara naalakkersuisutut atuuffinniit tunuarpunga, Bentiaraq Ottosen oqarpoq.

Taassuma tunuarnera Erik Jensenip (S) Aningaasaqarnermut Akileraartarnermullu ataatsimiititaliami siulittaasutut ippassaq tamanut ammasumik siunersiuinissamut aggeqqusinerata kingunerisaanik pivoq. 

Suliaq suliffissanut isertarfimmut nutaamut januaarip aallaqqaataanni piareertussamut tunngassuteqarpoq.

Ataatsimiititalialli suliap ingerlaneranik misissuinermini malittarisassat malinneqarsimanngitsut paasivaa.

- Suliaq oqimaatsoq annertooq pineqarpoq tassanilu allaffissornikkut ilisimanngisannik annertuumik kukkusoqarsimanera oqariartuutigivara, ippassaq siunersuisooqatigiinnermi ataatsimiisitaliaq peqatigalugu. Tassani kukkuneq annertooq pisimasoq oqariartuutigivara, Bentiaraq Ottosen oqarpoq.

Atassutip siulittaasuata, Aqqalu Jeremiasenip (A), Bentiaraq Ottosenip tunuarniuteqarnera nersualaarissutigalugu KNR-imut oqarpoq.

- Takusinnaasara malillugu oqarneratut tassa taanna suliaq akisussaaffik nammineq tigummagu, inuttaa pattalaarpara, nersualaarpara toqqaannartumik taamatut oqarsinnaammat. Akisussaaffimmik imaannaanngitsumik suliaqarnermini unneqqarilluni oqariartorsinnaammat, Aqqalu Jeremiassen oqarpoq.

Atassutip naalakkersuisoqatigiinni ataannarnissaa taassuma kissaatigaa. Nammineerlunili naalakkersuisunngorniarnani KNR-imut oqarpoq. Taamaakkaluartorli siulersuisut tamanna aalajangigassarigaat erseqqissaatigaa.

Bentiaraq taarserlugu illit naalakkersuisunngussavit?

- Naamik, naatsorsuutiginngilara taanna maannakkut, kisianni ulluinnarni aqutsisuninngaanniit taavalu siulersuisuninngaanniit tamanna inuttalerneqarnissaa isumagineqarumaarpoq, taanna oqarpoq.

Naalakkersuisoqatigiiginnarusuttut

Kina Isumaginninnermut, Suliffeqarnermut, Nunamullu Namminermut Avatangiisinullu naalakkersuisunngussanersoq naggataatigut naalakkersuisut siulittaasuata, Jens-Frederik Nielsen (D) akisussaaffigivaa.

Bentiaraq Ottosenip tunuarniuteqarluni nalunaaruteqareerneraniit akunnerit marluk qaangiummata naalakkersuisut siulittaasuata, pisortatigoortumik inatsisartut oqaluttarfianniit avammut nalunaarutigaa.

Taamaalilluni naalakkersuisut siulittaasuat naalakkersuisussamik nutaamik toqqaasussanngorpoq.

- Bentiaraq Ottosenip tunuarniutini tunniuppaa taannalu naalakkersuisut siulittaasuattut akueraara, taamaammat tassunga killippugut, Jens-Frederik Nielsen oqarpoq nangillunilu:

- Naalakkersuisut qanorpiaq aggulussanersut taanna maannakkut soorunami oqaaseqarfigiuminaappoq kisianni partiit taakkuulluta sisamaalluta naalakkersuisooqatigiinni suleqatigiippugut, aamma taanna sakkortuumik suli ingerlatissavarput. Naatsorsuutigissavarput suleqatigiit partiit sisamat taanna suliarissagaat, uangalu naalakkersuisut siulittaasuattut  pisussaaffiga malillugu toqqaajumaartugut.