Naalakkersuisut: Qeqqussanik nerisarit
Naalakkersuisut peqqinnerulernissaq kalaallillu tunisassiaataannik atuisoqarnerulernissaa pillugu suliniutaanut atatillugu Aalisarnermut Piniarnermut Nunalerinermullu Naalakkersuisoqarfik Nunat Avannarliit ministeriisa siunnersuisoqatigiiffiat suleqatigalugu Hans Egedep Illuani septembarip 9-aniit 11-iat ilanngullugu qeqqussat pillugit sammisaqartitsissaaq.
Aaqqissuussineq kalaallit nerisassaataannik atuinerulernikkut peqqinnerulernissamik Naalakkersuisut suliniutaanut ilaavoq.
Sammisaqartitsinerup siunertaraa inuit nerisassiornerminni qeqqussanik atuinerusalernissaat, tamannalu pissanganartumik oqalugiartitsinikkut, saqqummersitsinikkut pingaartumillu nerisassianik assigiinngitsunik ooqattaarisitsisarnikkut pissaaq. Igasunit pikkorissunit Annesofie Hardenbergimit aamma Inunnguaq Hegelundimit nerisassiarineqartussanik.
Læs også Qeqqussanik panersitsisartoq akissarsitinneqartoq
Pinngortitaleriffiup Aarhus Universiteti suleqatigalugu qeqqussat assigiinngitsut takusassiariniarpai, peqataasullu puigugassarinngisaminnik paasisaqarlutik angerlarsinnaassapput.
Matut pingasunngornermi 9. septembarimi nal. 19.00 ammarneqassapput tikilluaqqusisoqassallunilu, kingorna ilaatigut Ulrik Lyberthimit oqalugiartoqassaaq taassumalu suliarisartagai niuernertut takutitsinermik ilaqassalluni. Taassuma kingorna Susse Wegeberg aamma Ole Geertz-Hansen Pinngortitaleriffimmeersut qeqqussanik suliaqartarneq pillugu oqalugiassapput.
Sisamanngornermi tallimanngornermilu nal. 11.00 - 18.00 illu tamanut ammarneqassaaq, tamatumani soqutiginnittut tamarmik tikilluaqqusaassallutik.
