Qeqqussanik panersitsisartoq akissarsitinneqartoq
Greenland Business, Sisimiuni oktobarip 17-ianit 19-iata tungaanut inuutissarsiortunut Startupertitsivoq, Ulrik Lyberthilu, qeqqussanik tunisassiorluni namminersulerusuttup Maki Seaweedimik taallugu suliniutaa matumani akissarsitinneqarpoq, 5000 koruuninillu aningaasartaqarluni. Akissarsitinneqartorlu akissarsitinneqarnini tupaallaatigaa:
- Akissarsiakka aallarnernut qulinut naleqartunut atussavakka, Ulrik Lyberth, namminersulerusuttoq, tupaallassimaqisorlu oqarpoq.
Qeqqussat misissuiffigineqartuartut, tunisassiarineqarumanngitsulli qanoq iliornikkut inuussutissarsiutigilerneqarsinnaanersut taassuma pilersaarusiorpaa.
Aamma atuaruk Startup Greenlandimi ajugaasut aajuku
Ulrik Lyberth tunisassiornermik misilittagaqareerpoq, Danmarkimullu tunisereersimalluni, Greenland Businessip allaaseraa, qeqqussallu panerteriarlugit sequtsertalernissaat siunissami pilersaarutaasoq oqaatigineqarluni.
Namminersortut ingerlatitsilluartut ajugaaniunnermi nalilersuisut naliliinerminni pingaartippaat, ajugaasullu pilersaarutaa nutaajummat, avammullu tuniniaanissamut piukkunnarmat, Nunattalu siunissami aningaasarsiorneranut iluaqutaasinnaammat naliliilerminni tamanna aamma pingaartippaat.
Namminersulerusussuseqartut akunnerit 54-it iluanni pilersaarusiorneranni sakkusaannik misileraatinneqarnerat ikorfartuutigalugit Startupimik taallugu Sisimiuni katerisimaarnerup siunertaraa. Startupimut peqataarusullutik nalunaartut 14-iupput, pilersaarutillu tallimat saqqummiunneqarlutik.
