Naalakkersuisut GSG unitsippaat
![](/sites/default/files/styles/image_934x467/public/article_images/anda_uldum_okt13_0.jpg?itok=Sus3U3C7)
Ujarassiuutut misissuisarfissatut pilersaarutaagaluarsimasoq ateqartinneqartussarlu Geo Survey Greenland GSG, pilersinneqalinngilaq. Nunatta karsianit akissaqartinneqalernissami tungaanut aningaasanut inatsimmiit peerneqartoq, Aningaasaqarnermut, Aatsitassaqarnermullu Naalakkersuisoq Andreas Uldum Demokraatineersoq taama tusarliivoq.
- Suliniut taanna unitsikkallarneqarpoq, ilisimasatsituut aningaasatigut inissisimanitta ajornakusoortikkamiuk aningaasanik taama amerlatigisunik atuissalluni. Ilisimasat nunatsinniiginnarnissaat suliniutigiuassuarput, kisianni suliniut aningaasanut inatsimmiit peerallarneqarpoq, Aatsitassaqarnermut Naalakkersuisoq Andreas Uldum taama oqarpoq.
50 million koruunit missaanni sipaassavaat
Pilersaarutaagaluartut malillugit GSG 40-nik sulisoqarluni 40 million koruuninik ingerlatsinermut tapiissuteqarfigineqartartussaagaluarpoq, saniatigullu suliassanut ingerlatsinissanut tapissutissat 11,5 million koruunit pilersaarutaasimagaluarlutik. Taakkuli katillugit 51,5 million koruuniussallutik. Aningaasartuutaasussalli saniatigut aamma inissiassanut atortussanullu aningaasarpassuarnik atuisoqarnissaa pilersaarutinut ilaasimagaluarput.
Aamma atuaruk GSG ukiumut 50 millioninik akeqartassaaq
Aamma atuaruk Kommunip GSG aningaasarsiutaasinnaanera upperinngikkaa
Andreas Uldumilli GSG pilersinnissaanut piffissaasorinnginnamiuk siulliunniarunnaarpai, pilersaarutaasorlu unikaallatsillugu. Unitsivinneqalinngilarli.
Ilisimasat nunatsinniiginnassasut kissaatigaa
- Periarfissat misissussavagut assigiinngitsut modellit qimerluualaassuagut, qanorililluta aningaasartuutikinnerpaaffianiitillugu ilisimasat nunatsinniiginnarnissaat sulissutigalugit, soorunalimi nunatsinniittussaagamik nunatsinnut tunngatillugit ilisimasat. Imaanngilaq suliniut tamarmi unitsiinnarneqartoq.
Aamma atuaruk GEUS-ip GSG-ssaq suleqatissamitut isigaa
Naalakkersuisulli suleqatigeriikkanut assani isaappai, taakkuami ukiuni 130-ni kingullerni nunatsinni ujarassiuutinut tunngasunik suliaqartarmata.
- GEUS-mut suleqatigiinnerput pitsaasoq suli nukittorsaqqerusupparput. Aamma oqaloqatigiinnikkut taanna pissooq. Qularutigineqassanngilaq siunissaq qaninnermi GEUS attavigineqassasoq, qanoq ililluni eqaannermik pitsaanermillu suleqatigiissanersugut, Aatsitassanut Naalakkersuisoq Andreas Uldum Jonas Løwshall-Wedellimut taama oqarpoq.