GEUS-ip GSG-ssaq suleqatissamitut isigaa
2014-18-imut uuliasiorneq aatsitassarsiornerlu pillugit iliuusissami nutaami, danskit ilisimatuussutsikkut sullissiviannik GEUS-imik suleqateqarnermut taarsiullugu Geological Survey Greenlandimik, GSG, pilersitsisoqarnissaa Naalakkersuisunit nalunaarutigineqarpoq.
- Kalaallit Nunaata ujarassiuutut misissuinikkut piginnaasaminik annertusaaniarnera pissusissamisuuinnarpoq. Tamannami akissaqarfiginissaa sulisussartinnissaalu ilutigalugu pisinnaavoq, GEUS-ip pisortaa Johnny Fredericia oqarpoq.
Aatsitassanut naalakkersuisoq Jens-Erik Kirkegaard GEUS-ip GSG-mik taarserneqarnissaanik paatsuugassaanngitsumik oqarsimagaluartoq, GEUS-ip pisortaata suleqatigiinnerup kipivissorneqarnissaa ilimaginngilaa:
- GSG suleqatissatut isigaarput - imaanngitsoq suleqatiginngivissorneqassasoq, ilaatigulli aamma suleqatigineqassasoq. Tamatumalu qanoq sivisutigisumik ingerlanneqarnissaanut kalaallit qanoq kissaateqarnersut apeqqutaajumaarpoq.
GEUS-ip Nunatsinni suliaanik tigusinissaq akikitsuinnaanavianngilaq. Ilisimatuussutsikkut sullissiviup missingersuutaasa pingasorarterutaat ukiut tamaasa Nunatsinni atorneqartarput, 100 mio. koruunit missaanniittarlutik. Taakkunannga 15 mio. koruunit missaat Namminersorlutik Oqartussanit aningaasaliissutaasarput, sinneruttullu 85 mio. koruunit missaanniittut danskit naalagaaffiata aningaasaateqarfiillu assigiinngitsut akilertarpaat, Johnny Fredericia oqarpoq.
Kalaallit Nunaanni GEUS-itut ittumik pilersitsinissaq sivisuupilussuarmik anguniarneqartariaqassaaq, pisortaq naliliivoq nangillunilu:
- Sullissivimmik anginngitsumik piffissaq sivisuallaanngitsoq atorlugu pilersitsisoqarsinnaavoq, GEUS-itulli annertutigisumik pilersitsinissaq ukiorpassuarni suliassaavoq. Pinngortitaleriffiup pilersikkiartuaarneranut assersuunneqarsinnaavoq, taannalu ullumikkut sullissiviuvoq ingerlalluartoq, ukiulli 20-t atorlugit pilersikkiartuaarneqarsimalluni.
GEUS-ip Namminersorlutik Oqartussallu akornanni isumaqatigiissut ukiup naanerani atorunnaassaaq, nutaamillu isumaqatigiissusiornissaq maanna isumaqatiginninniutigalugu aallartittoqartussaalluni. Jens-Erik Kirkegaardip KNR-imut oqaatigaa isumaqatigiissutip sivitsorneqarnissaa naatsorsuutigalugu, GSG-lli aappaagumit 2016-imiilluunniit aallartissinnaanissaa neriuutigalugu.
