Partii Naleraq Naalakkersuisoqatitik suleqatigeqqikkusuppaat
Inuussutissarsiummut, nunatsinnut pingaarnerpaasumut, isumaat assigiinngillat.
Taamaakkaluartoq suleqatigiinneq Partii Naleqqap iluarisimaarpaa.
- Nukiit amerlanerusut ataatsimoornissaat pingaartikkatsigu, peqataatinneqassagutta piareersimavugut suleqataaqqinnissatsinnut, Hans Enoksen oqarpoq.
2014-mi Inatsisartunut qinersisoqarmat Partii Naleraq 3.423-nik taaneqarpoq pingasunillu inatsisartuni ilaasortaatitaqalerluni.
AAMMA ATUARUK Aalisarnermut inatsit mittarfiillu kinguartinneqartussanngortut
Qinersinerullu kingorna partiip naalakkersuisoqatigitigisimasani suleqatigeqqissallugit piareersimavoq.
- Tunngavikkut ajornartorsiuteqarpasinngilagut, kisianni qineqqusaarnermi qinersinermilu inernerit taakkua alajangerneqartussaassapput, Hans Enoksen oqarpoq.
Tassami partiip siulittaasua naapertorlugu, naalakkersuisoqatigiit maanna tunualersut tunuliaquteqarluartullu angusaqarluarsimapput.
- Sulinerup ataatsimoortumik ingerlanneqalernera, aporaassutissat ujarnagit, kisianni qanoq ililluta inuiannut pitsaanerpaamik angusaqartitsisinnaavugut, Partii Naleqqap siulittaasua taama oqarpoq.
Kisianni partiit maanna naalakkersuisuutitaqartut aalisarnermut inatsisissatut inatsisissaq naammassinngitsoorpaat, malunnartumik isumaqatigiinnginnamik.
AAMMA ATUARUK Aalisarnermut inatsit aallanngussaaq
Illuanilli Inuit Ataqatgiit piujuaannartitsinissamik pingaartitsillutik aningaasarsiornikkut attanneqarsinnaasumik ingerlatserusupput.
Illuanilu Siumut Partii Nalerarlu aalisarnerup amerlanerusunut siammarneqarnissaanik kissaateqartut.
- Taamaalilluni pisussutit uumassusillit inunnut amerlanerpaanut siammarneqarnissaa anguneqartussanngussagaluarmat, Hans Enoksen Partii Naleqqami siulittaasoq taama oqarpoq