VIDEO Aalisarnermut inatsit aallanngussaaq

Aalisarnermut inatsit ikinnerpaamik qulequttanik qulinik allannguuteqarfiussasoq Naalakkersuisooqatigiinnissamut isumaqatigiissummi 2015-imi allannguiffiusussanngorpoq. Avannaani sikusartumi qaleralinnik pisassiissutigineqartut avataasigut immikkut pisassiisoqartalissaaq, piniarnermut allagartat kommuninit isumagineqartalissapput, aalisakkallu avammut tunisassiarineqartut naleqarnerulersinneqarnissaat anguniarneqassaaq. Takku tassaapput inatsimmi allannguutissatut taaneqarsinnaasut ilaat.

- Aalisarnermut inatsit ullumikkut atuuttoq Namminersornerullutik Oqartussaagallarnerup nalaani, 1996-imi, atuutilersinneqarpoq, taavalu massakkut ukiut ingerlaneranni ingerlareersimasut kingumut qiviaraanni nunarput aalisarnikkut allatigullu ineriartorsimavoq annertumik aammalu 2009-mi Namminersornermut ikaarsaarnikuusimalluta. Taamaammat pissusissamisoorpoq aammalu pisariaqarluni inuiaqatigiit killiffigisaannut aalisarnermut inatsit naleqqunnerusoq pilersinniassallugu pilersissallugulu, Aalisarnermut Naalakkersuisoq, Karl-Kristian Kruse, KNR-imut oqarpoq.