Naalakkersuisoqataasut ileqqaartussaatitaaneq isumaqatigiinngissutigigaat

Soraarnerussutisiassanik pinngitsaaliilluni ileqqaartussaatitaaneq atorunnaassaaq. Tamanna Naalakkersuisut suliarinianngippassuk naalakkersuisoqataasut, tassa Atassut, Inatsisartunut siunnersuuteqarniarput.

- Aallartinnianngippassuk Inatsisartuni amerlanerussuserneqarsinnaanersoq misilikkumaarparput Atassummit. Tassa imaappoq siunnersuummik suliaqarluta, Aqqalu Jerimiassen KNR-imut oqarpoq. Nangipporlu:

- Partiit ilaasa qineqqusaarutigigamikku ajunngilaq anguniarunnaarsimagunikku naalakkersuisunngoramik taanna nammineq akisussaaffigissuaat, Aqqalu Jerimiassen oqarpoq.

Neriorsuisoq

Demokraatit aamma Naalakkersuisut maanna siulittaasuata, Jens-Frederik Nielsenip pinngitsaaliilluni ileqqaaritititsineq atorunnaassasoq upernaaq qineqqusaarami oqarpoq.

- Pinngitsaaliilluni utoqqalinersianik katersisussaatitaaneq unitsissavarput, Jens-Frederik Nielsen facebookkikkut qineqqusaarnermini oqarpoq.

Tamannali pissaanermik tigumminnilerneranni suliarineqassanersoq qularnartoq KNR-imit siusinnerusukkut oqaluttuaraarput. Jens-Frederik Nielsen qineqqusaarnermi neriorsuinikuunini pillugu KNR-imit aamma apersoqqunngilaq.

IA: Suleqatigiissitaq utaqqimaassavarput

Naalakkersuisut suleqatigiissitamik, immikkut ilisimasalinnik inuttalimmik, pilersitseqqaarusupput. Suleqatigiissitaq innersuussuteqassaaq. Suleqatigiissitarli suli pilersinneqanngilaq aamma sunik innersuussuteqassanersoq oqaatigineqareersinnaanngilaq.

Inuit Ataqatigiit pinngitsaaliiunnaartoqassanersoq toqqaannartumik akerusunngillat. Suleqatigiissitammi innersuussutai tusarnaarusuppaat.

- Neriuppunga suleqatigiissitaq piaartumik aallartissagaat Naalakkersuisut. Taamaaliornikkut pitsaanerusumik sukkanerusumillu aaqqiissutissamik tikkuaasoqarpat suliaq ingerlassinnaassagatsigu, Marianne Paviasen Jensen oqarpoq.

Siumut: Ileqqaartoqartariaqarpoq

Inuilli namminneq katersillutik ileqqaartariaqartut, taamalu iliortoqanngippat Kalaallit Nunaat akiliisinnaajunnaassasoq, Siumumeersoq, Erik Jensen, isumaqarpoq.

- Ileqqaartussaatitaaneq atorunnaarsinneqassappat nunatta karsia kommunillu karsii aningaasaataarutissapput. Sukkasoorujussuarmik. Nunarput akiliisinnaajunnaarsikkusunngikkutsigu nammineq aamma immitsinnut utoqqalinissatsinnut katersisariaqarpugut, Erik Jensen oqarpoq.

Taassuma 25-leereersut 60-liinissamik tungaanut katersisarnissaat kissaatigaa. Inuit 150.000 koruunit sinnerlugit ukiumut isertitallit maanna katersisussaatitaapput, Siumup tamanna aamma 250.000-mut qaffannissaa kissaatigaa.

KNR-ip Demokraatit Inatsisartuni gruppiat saaffigaa. Taakkuali saaffiginnissummut ilanngutassiap suliarinerani qisuarianngillat.