Ileqqaartussaatitaaneq atorunnaarsinneqassanersoq qularnartoq
Demokraatit Naalakkersuisullu maanna siulittaasuat, Jens- Frederik Nielsen, Inatsisartunut upernaaq qineqqusaarnermi ilaatigut ima qineqqusaarpoq:
- Pinngitsaaliilluni utoqqalinersianik ileqqaartussaatitaaneq unitsissuarput. Ullumikkut inuppassuit sulisartuuguit, aalisartuaraaguit inuussutissarsiortuuguit ulluinnarni aningaasat atorfissaqartitatit ajoraluartumik tigusinnaanngilatit. Pinngitsaaliilluni inuiaat taama pillugit akuersaarneqarsinnaanngilaq.
Jens- Frederik Nielsen, Facebookkimi quppernermini oqarpoq, maanna suli tusarsaasumik.
Taanna Naalakkersuisunut siulittasuulluni Kalaallit Nunaanni politikkikkut maanna pissaaneqarnerpaavoq. Soraarnerussutisiaqalernissamulli pinngitsaaliilluni ileqqaartussaatitaaneq atorunnaassanersoq suli qularnarpoq. Tamanna Inatsisartunut ilaasortap, Naleqqameersup, Pele Brobergip, Naalakkersuisunut apeqquteqaataata akissutaani atuarneqarsinnaavoq.
Naatsorsuuteqaraluartoq
Akissut pakatsissutaavoq.
- Allanngorlugu pinngitsaaliissutaajunnaarluni nammineq kajumissutsimik allanngorlugu piareersimanissaat naatsorsuutigigaluarakku. Taannali ajoraluartumik aamma pakatsissutigaara takullugu akissutaat, Naleqqap siulittaasua, Pele Broberg oqarpoq.
Naalakkersuisut Inatsisartunut ilaasortamut akissumminni naalakkersuisoqatigiinnissamut isumaqatigiissumminni oqaaseqatigiit innersuussutigaat. Naalakkersuisummi soraarnerussutisiat pillugit aaqqissuusseqqinnissaminnut, suleqatigiissitamik, immikkut ilisimasalinnik inuttalimmik, pilersitsereerpata, suleqatigiissitap innersuussutai toqqammavigalugit politikkikkut 2026-imi isumaqatigiittoqassasoq, Naalakkersuisut allapput. Taamanikkussamullu pinngitsaaliilluni ileqqaartussaatitaaneq innersuussutinut ilaajumaarnersoq siuningerlugu oqaatigineqareersinnaanngilaq.
Broberg: Aaqqiissutissaq nalunngikkaluarparput
Pinngitsaaliinerli kukkunerummat aaqqiissutissarlu, tassa pinngitsaaliiunnaarneq ilisimaneqareermat, suleqatigiissitamut aningaasartortoqartariaqanngikkaluartoq Pele Broberg isumaqarpoq.
- Nalorninartortaqanngilaq. Suleqatigiissitamik pilersitsisoqartariaqanngilaq. Politikkikkununa aalajangernissaq amigaatigineqartoq, Pele Broberg oqarpoq.
Demokraatilli Naalakkersuisullu siulittaasuata qineqqusaarutaa Naalakkersuisuni toqqaannartumik maanna suliarineqanngilaq, Naalakkersuisullu atorfilittaminnit aqunneqartuusut, illua-tungiliuttut siuttuat isumaqarpoq.
- Allannguinianngilagut. Nikisitsinianngilagut. Atorfilittanit nunarput aqunneqassaaq, Pele Broberg oqarpoq.
Naalakkersuisut imminnut innersuuttaattut
Naalakkersuisut siulittaasuat, Jens-Frederik Nielsen, pinngitsaaliiunnaarnissamik qineqqusaarnermi neriorsuutini pillugu KNR-imit apersoqqunngilaq. Taassuma aningaasaqarnermut akileraartarnermullu naalakkersuisoq, Múte Bourup Egede innersuussutigaa. Taannali aamma apersoqqunngilaq, Naalakkersuisullu siulittaasuat apersorneqarumanngitsoq innersuullugu.
