Kuannersuarni aatsitassarsiorfik niuerunnaarallartoq: Naalakkersuisoqarfiup pisortaata isornartorsiuineq pissutissaqannginneraraa
Energy Transition Milerals (ETM) Kuannersuarni Inatsisartunut 2021-mi qinersinerup kingorna, piiaanissamut akuersissummik tunineqanngillat.
Aatsitassarsiornissamulli akuersissummik ukiup nikinnerani atorunnaartumik peqaraluarput.
ETM-ip maanna ilisimatinneqarsimavoq aatsitassarsiornissamut akuersissutaat sivitsorneqarnissaa ilimanaateqanngitsoq. Ingerlatseqatigiiffik tamatuma kingunerisaanik marsip 30-aniit nioqquteqarunnaarallarpoq.
Ingerlatseqatigiiffik tusagassiuutinut nalunaarummi allappoq, piffissarititamik sivitsuinissaq septembarimi qinnuteqaatigereerlugu.
Aammattaaq ingerlatseqatigiiffik siusinnerusukkut isumaqatigiissutip sivitsunnginneranut piumasaqaatit pillugit pitsaasumik oqaloqatiginnissimanerarput.
Taamaattumik ETM-ip Namminersorlutik Oqartussat sivitsuissangannginnerarlutik maanna nalunaarnerat tupaallaatigaa.
- Allagaq marsip 27-anneersoq naatsorsuutiginngilarput, ingammik oqartussaasut akuersissummik sivitsorneqannginnissaa siusinnerusukkut nalunaarutiginngimmassuk, ETM tusagassiuutinut nalunaarummi oqarpoq.
Australiamiut suliffeqarfiutaat Namminersorlutillu Oqartussat taamaalillutik isumaqatigiinngissuteqarsinnaapput.
Naalakkersuisoqarfimmi pisortaq uppernarsaavoq
KNR-ip Aatsitassanut Inuussutissarsiornermullu Naalakkersuisoqarfimmi pisortaq, Jørgen Hammeken-Holm, oqaloqatigaa.
ETM-ip akuersissutaa sivitsorneqassanngitsoq, taassuma uppernarsarpaa.
- Illuatungeriinnik tusarniaassummik aalajangiiffigisassatut siunnersuummik nassiussiniarluta nalunaarfigereerpavut, tassalu Kujataani ujarassiuutut misissuinissamut akuersissutaat sivitsorneqassanngitsoq, naalakkersuisoqarfimmi pisortaq oqarpoq.
Naalakkersuisoqarfimmili pisortap aalajangiinerup tunuliaqutai pillugit maannakkorpiaq oqaaseqarusunngilaq.
Siullermik ETM-i aalajangiinerup takunissaanut periarfissinneqassaaq, taakkulu apriilip 13-ianut akissuteqarnissamut piffissalerneqarsimapput.
Aalajangiinerup tusarniaanerullu nassiunneqannginnerani, ETM-imi pisortaq Daniel Mamadou-Blanco tusagassiuutinut nalunaarummi allappoq:
- Ukioq manna nunaqavissunik misissuinitsinni sulisussarsiorniarluta, misissuinitsinnut atatillugu uternissatsinnut piareersarsimagaluarpugut, taamaattumik nalornineq manna uggornarpoq.
KNR-ip Daniel Mamadou-Blanco oqaaseqartinniarlugu attaveqarfigigaluarpaa. Tamannali piffissaliussap iluani iluatsinngilaq. ETM-ip qisuariarnera pillugu KNR-i immikkut allaaserisamik malitseqartitsiniarniarpoq.
Neriorsuuteqarsimanermik neriorsuuteqarsimannginnerarneq
Maannamut paasinninnerat malillugu Namminersorlutik Oqartussat akuersissummik sivitsuiniarsimagaluartut, Pisortaq Daniel Mamadou-Blanco tusagassiorfinnut nalunaarummi allappoq
Jørgen Hammeken-Holmilli ETM-imik oqaloqatiginninnertik allannguuteqarsimanngitsoq naqissuserpaa.
- Suliffeqarfik sunut tamanut atatillugu, soorlu qanoq eqqarsarnersugut eqqarsannginersugulluunniit, oqaloqatigineq ajorparput. Pisariaqarfiatigut aatsaat attaveqarfigisarpavut. Tamanna malittarisassat malillugit ingerlavoq, naalakkersuisoqarfimmi pisortaq oqarpoq nangillunilu:
- Immaqa siusinnerusukkut tamanna pillugu oqaloqatigisimassavavut, kisianni qinnuteqarnermi sivitsuisoqanngitsoorsinnaanera tamatigut aarlerinaataasarpoq. Sivitsuisoqarnissaanik aamma ilimasaarisarsimanngilavut.
Paasilluarniassagatsigu; akuersissutip sivitsorneqarnissaanik neriorsuuteqarsimanngilasi?
- Naamik, sumilluunniit neriorsuuteqarsimanngilagut.
Sivitsorneqarnissaanik ilimasaarisarsimanngilasi?
- Naamik. Tamanna ersarilluinnarpoq.
Ukiuni kingullerni akerleriittoqartarnera pissutigalugu suliffeqarfiup niuerfimmit anisinniarneqarneratut tamanna isigineqarsinnaava?
- Naamik, akuersissummut taassumunnga tunngasut aalajangersimasut kisiisa isummerfigivavut. Taamaaliortussaavugut.
- Allanut tamanut tunngasut tunngavilersuutigineqartut isummerfigisinnaanngilakka. Akuersissummut tassunga, tassanilu ingerlatassanut taamaallaat isummerpunga.
