Eqqartuussiviup suliaq Danmarkimi aalajangiiffigineqarsinnaannginnerararaa: Kuannersuit pillugit aaqqiagiinnginneq ingerlaannassasoq

Ingerlatseqatigiiffik Kuannersuarni suliniuteqartoq Namminersorlutik Oqartussat pillugit eqqartuussivimmut suliakkiissuteqarnerata qaammatip siuliani itigartitsissutigineqarpoq.

Energy Transition Minerals (ETM) – siusinnerusukkut Greenland Mineralsimik taaguuteqartoq – piiaanissamut ukiut pingasut matuma siorna itigartinneqarpoq. Taakku tamatuma kingorna Namminersorlutik Oqartussat 80 milliardit koruuninik akiliisinniarlugit eqqartuutitinniarpaat.

Ingerlatseqatigiiffik saniatigut Københavnip eqqartuussivianut nunattalu eqqartuussisuuneqarfianut suliassanngortitsivoq.

Københavnip Eqqartuussiviata Namminersorlutik Oqartussat ETM-illu akornanni eqqartuussivimmi suliaqarnissaq itigartitsissutigigaa, Naalakkersuisut tusagassiuutinut nalunaarummi ullumi paasissutissiissutigaa.

Aatsitassanut Naalakkersuisup, Naaja Nathanielsenip eqqartuussivilersuussiniarneq ‘suliassami ilungersunartumik tunngaviusussamilu pimoorussinani periusissatut’ taavaa.

- Taamaattumik aamma Københavnimi Byretimi aalajangiineq naammagisimaartorujussuuara, tassani aalajangerneqarpoq Kalaallit Nunaanni pineqartunut suliassaq Københavnimi ingerlanneqarsinnaanngitsoq. Taamaaliornermi Isumaqatigiissitsiniarnermut eqqartuussivimmi aamma Københavnimi Byretimi piumasarisagut uppernarsarneqarput, Naaja Nathanielsen allappoq.

Naalakkersuisut suliaq Nunatta Eqqartuussisuuneqarfiani suliarineqarnissaa qilanaaraat.

- Suliassaq Kalaallit Nunaanni eqqartuussivimmi siulliulluni suliarinnittussami ingerlanneqartariaqaraluartoq, Naalakkersuisut suliap ingerlanera tamaat aalajangiusimavaat, taamaattumillu suliassap Nunatta Eqqartuussiviani ingerlaqqinnissaa qilanaaraarput.

ETM naammagisimaarinnittoq

Ingerlatseqatigiiffik ETM Københavnip eqqartuussiviata aalajangernera aamma naammagisimaarpaa.

ETM-ip pisortaata, Daniel Mamodoup tusagassiuutinut nalunaaruteqarnermini eqqartuussiviup ullumikkut aalajangernera Danmarkimi siunissami eqqartuussivitsigoortitsinissamut periarfissiinerarpaa – kisianni aatsaat Kalaallit Nunaanni suliami ajugaassagunik.

Taamaammat eqqartuussiviup aalajangernera ajugaanertut isigaat.

- Kalaallit Nunaanni oqartussat, Greenland Mineralsip Kalaallit Nunaanni Danmarkimilu naalakkersuisut pillugit eqqartuussivilersuussiniarnerani Danmarkimi suliani illuatungiliuttuusinnaanngitsut aalajangerpaa, ETM-imi pisortaq, Daniel Mamadou allappoq:

- Tamanna ilassilluarparput, pingaartumik tamanna aaqqissuussinermut ukiup ataatsip missaata matuma siorna siunnersuutigisatsinnut uppernarsaanera pissutigalugu. Isumaqatigiissitsiniarnermut eqqartuussiviup aamma danskit eqqartuussiviata periuserisatsinnut ilanngunnerat pitsaasuuvoq, suliaq taamaalilluni ingerlaqqissinnaavoq.

Naalakkersuisut tupigutsattut

ETM-ip eqqartuussiviup aalajangerneranik naammagisimaarinnilluni nalunaaruteqarnera naalakkersuisut tupigutsaatigaat – pingaartumik ETM-ip suliassanngortitsinernik pingasunik aallartitsisuunera pissutigalugu.

- Ingerlatseqatigiiffiup immikkoortortamik suliassaa isumaqatigiissitsiniarnermut eqqartuussiviup aalajangiinerata kingorna nukittunerulersoq, Energy Transition Minerals A/S inerniliimmat, tupaallannartutut isigaara, Naaja Nathanielsen tusagassiuutinut nalunaarummi allappoq:

- ETM-ip taamanikkut siunnersuutigisaa tassaavoq, eqqartuussivinni aalajangiinissat utaqqineranni isumaqatigiissitsiniarnermut eqqartuussivik unitsikkallassagipput. Tamanna Naalakkersuisut akuerinngilaat, maannakkullu isumaqatigiissitsiniarnermut eqqartuussivimmi imaluunniit Københavnip eqqartuussiviani suliassami qitiusoq suliarineqarsinnaanngitsoq aalajangerneqarpoq. 

Naaja Nathanielsenip isumaqatigiissitsiniarnermut eqqartuussiviup suliassat ilai siunissami naliliiffigisussaaffigisinnaasani itigartitsissutigisimanngikkaa oqaatigaa. Taamali pisoqarnissaa ilimagivallaanngilaa.

- Taamaalilluni tassani pisussatut ilimanarpallaanngitsoq pineqarpoq, isumaqatigiissitsiniarnermut eqqartuussiviup qulequttamik suliassaqarfimmi iluaniinngissinnaasumik suliarinnissinnaannginnissani sioqqutsisumi mattussinnaanngikkaa, taamaallaat pineqarluni.