Naqqiissut: Ilanngutassiami siusinnerusukkut aatsitassarsiortitseqatigiiffik ETM Kuannersuarni uranimik piiaanissamik pilersaaruteqartoq allassimagaluarpoq. Tamanna eqqoqqissaanngilaq, tassami aatsitassanik qaqutigoortunik piiaanissaq kissaatigaat, tassanilu uranilu aatsitassallu allat radioaktiviusut aamma saniatigut piiarneqarsinnaallutik.

- Kuannersuarni aatsitassarsiorusuttut uteqattaaginnarput – takussaaginnaavipput.  

Narsami innuttaasut ilaat, Ivalo Motzfeldt, taama oqarpoq.  

Taanna peqatigiiffimmi Urani Naamik-mi ilaasortaavoq, Kuannersuarnilu aatsitassarsiornissamut februaarimi akerliussutsimik takutitsinissamik aaqqissuisooqataalluni. 

Aatsitassarsiortitseqatigiiffimmit Energy Transition Mineralsimit (ETM) Narsamut tikeraartoqarnerani akerliussutsimik takutitsisoqarpoq. Tamanna qinersisoqarnerata nalaani pivoq.  

Australiamiunit pigineqartoq ETM – siornatigut Greenland Minerals and Energy-mik ateqarnikoq – qinersinermi 2021-mi uranimut akerliunerup qaffasinnerpaaffissaaniinnerani amerlanerit eqqaamassajunnarsivaat.  

Aatsitassarsiortitseqatigiiffiup Kuannersuarni aatsitassanik qaqutigoortunik saniatigullu uranimik piianissamik pilersaarutitik pillugit, Narsami innuttaasut paasissutissiinermik ataatsimiititsisaqattaarpoq.  

IA-p aatsitassarsiornerup inerteqqutigineqalernissaanut qineqqusaarnini qinigaassutigaa. Greenland Minerals aatsitassanik piiaanissaminnut akuersissummik qinnuteqarnertik pillugu itigartinneqarpoq, tamatuma kingorna aatsitassarsiortitseqatigiiffiup Danmark nunarpullu eqqartuussivilersuuppai, 70 milliardit koruuninillu taarsiiffigineqarnissaminik piumasaqarluni. 

Tikeraartoqarnera toqqissisimanngitsitsisoq  

Aatsitassarsiortitseqatigiiffiulli Narsami angusaqarusussusaata unitsinneqarnissaanut iliuuseqartoqarnerusariaqarpasippoq.

Energy Transition Mineralsimi, pisortap, Daniel Mamadoup,  februaarimi tikeraaqqinnermini, Kuannersuit Kalaallit Nunaata nunarsuarmi unamminarsinnaasumi, namminiilivinnissaanut iluaqutigisinnaagaa Politikenimut nassuiaavoq.  

- Politikeriunngilanga, kisianni namminersulivinniaraanni aningaasaqarneq pitsanngorsarneqaqqaartariaqarpoq. Aningaasaqarneq pitsaasuuguni tamanna nunamut pissutsinik taamaattunik aqutsisinnaatitsissaaq, aatsitassarsiortitseqatigiiffimmi pisortaq oqarpoq.

ETM-ip Kuannersuarnut iperaasimannginnera Narsami toqqissiviilliortitsivoq. Taamaammat Daniel Mamadou, ETM-imeersullu allat februaarimi tikimmata, Ivalo Motzfeldt innuttaasullu allat Urani Naamik-mit allagartarsuit saqqummersippaat. 

- Inuiaqatigiiulluta uran naaggaarparput, aamma tamanut ersarippoq. Taamaammat aatsitassarsiorusuttunit tamanna ataqqineqartariaqarpoq, Ivalo Motzfeldt oqarpoq.  

- Toqqissisimananngilaq. Sualummik aalajangiussaq politikeriniit allanngortinneqariaannaammat, taanna oqarpoq.  

Naalakkersuisoq: Ernumasoqartariaqanngilaq 

Februaarimiilli pisoqarnikooqaaq – Naalakkersuisullu nutaat sulilernikuullutik.  

Aatsitassarsiornermi naalakkersuisuuffik Naaja Nathanielsenip (IA) tigummiinnarpaa, naalakkersuisooqatigiilertullu aatsitassat pillugit periusissaq januaarimi saqqummiunneqartoq attatiinnassavaat.  

Uranisiornissamut inerteqqut suli atuuppoq, aatsitassanilli piiaaneq nunatta siunissami aningaasaqarneranut qitiunissaa suli angorusunneqarpoq.

- Aatsitassanut periusissaq nutaaq tunngavigalugu suliniuteqartut innuttaasunullu akornanni oqaloqatiginninneq ingerlatiinnassavarput, aatsitassarsiornerullu inuiaqatigiinnut iluaqutaanissaa suliniutigissallugu, Naaja Nathanielsen KNR-imut oqarpoq.  

Innuttaasut Kuannersuit ernumassutigisariaqanngikkaat, taanna erseqqissaavoq.  

Assi © : KNR / Malik Brøns

- Kujataani aatsitassarsiorneq Kuannersuarniinnaanngilaq. Suliat assigiinngitsut kujataata aningaasaqarneranut sunniuteqarluartut ingerlanneqarput, taanna oqarpoq. 

Periusissaq taanna Ivalo Motzfeldtip Narsameersup akuersaarsinnaagunarpaa: 

- Uranisiornissamut pilersaarusiartik allanngortinnianngikkaat toqqissisimanarpoq, taanna oqarpoq, nangillunilu: 

- Tassami aatsitassarsiornerup aningaasatigut arlaatigut iluaqutaanissaa kissaatiginarpoq, nunamut pinngortitamullu ajoqusiinissaa annikinnerpaaffissaminiissinnaappat akuerisinnaassavara.