Naalakkersuisoqarfiup KNAPK politiinut unnerluutiginialersaaraa
Aalisarnermut naalakkersuisoqarfiup ippassaq unnukkut tusagassiorfinnut nalunaarutaani tamanna erserpoq.
KNAPK-p ippassaq tusagassiortunik katersortitsinermini saqqummiussaani oqaaseqatigiit ilaat Naalakkersuisoqarfiup sakkortuumik qisuariaateqarfigai.
- Aalisarnermut naalakkersuisoqarfik atorfilittanit allamiut kalaallinik naqisimanninniartunit ullumikkut tupinnaannartumik aqunneqartoq. Allaammi atorfilittat allamiut nunaqqatiminnut Kalaallit Nunaannut attuumassuteqanngitsunut pisassiissutinik tunniussisalersimallutik, KNAPK taama allappoq.
AAMMA ATUARUK KNAPK inuiaqatigiinnut pingaaruteqartussanik nalunaaruteqarniarluni tusagassiortunik katersortitsilersoq
"Atorfilittanik allamiunik" oqarnermi Naalakkersuisoqarfimmi atorfilittat islandimiut savalimmiormiullu pineqartut, KNAPK-p pisortaata Petrus Bilmannip tusagassiortunik katersortitsinerup kingorna KNR-imut ilisimatitsissutigaa.
Taamaattoqarneranilli oqalunneq Naalakkersuisoqarfiup ilumuunnginnerarpaa.
- KNAPK-p Naalakkersuisoqarfimmi atorfilittanut, nunanit allaneersunut, pasilliinera Aalisarnermut, Piniarnermut Nunalerinermullu Naalakkersuisoqarfiup akuersaarsinnaanngilluinnarpaa. Kattuffik isumaqarpoq atorfilittat nunanit allaneersut nunaqqatitik salliutillugit pisassittaraat. Naalakkersuisoqarfiullu nunat allamiut aalisariutinik piginnittui ukioq manna avaleraasartoortassanik pisassiinermi salliutittaraat kalaallinit pigineqartut pingaarnerutinneqassanatik, naalakkersuisoqarfimmi pisortaq Jørgen Isak Olsen taama allappoq.
Naalakkersuisoqarfiup naqissuserusuppaa sulisut avaleraasartoortassanik pisassiineq-ajormata, Naalakkersuisulli tassaammata avaleraasartoortassanik pisassiinermi aalajangiisartut.
Taamaammat Naalakkersuisoqarfiup atorfilittat nunanit allaneersut nunaqqatiminnut pisassinneqarnerartarlugit KNAPK-ip oqarnera eqqortuuserinnginnamiuk, Naalakkersuisoqarfiup kattuffik politiinut unnerluutigissallugu isumaliuutigivaa, Jørgen Isak Olsen taama naqissusiivoq.
