KNAPK inuiaqatigiinnut pingaaruteqartussanik nalunaaruteqarniarluni tusagassiortunik katersortitsilersoq

Sulisitsisut Peqatigiiffiat, GA, Inatsisartunut qinersinissamut atatillugu oqallinnermut sapaatip-akunnerata siuliani akuliuppoq. Kalaallit Nunaanni Aalisartut Piniartullu Kattuffiat, KNAPK, maanna aamma akuliuppoq.
Assi © : KNAPK
Allattoq Mads Lynge
novembarip 18-at 2014 07:50

KNAPK, tusagassiortunik katersortitsinissamut ualeru nalunaaqutaq marlunut maanna qaaqqusivoq, namminneq oqarnerattuut "inuiaqatigiinnut aaqqissuussaanitsinnut pingaaruteqartussanik nalunaaruteqarnissaq pissutigalugu", tusagassiortunik katersortitsiniarluni.

Inuiaqatigiinnut pingaaruteqartussanik nalunaarutigineqarniartut suunersut sukumiinerusumik nalunaarutigineqanngilaq, Inatsisartunulli ukioq manna qinersinissamut, minnerunngitsumillu politikkikkut Inatsisartunut Naalakkersuisoqarnermullu iserumaartussanut nalunaaruteqarniarnertik pillugu tusagassiortunik katersortitsiniarnertik oqaatigaat.