Naalakkersuisoqarfiit suli amerlassusilerneqanngillat
Naalakkersuisut amerlassusissat ippassaq oqaluuserineqartut aamma ilagaat. Siumup isumaqatigiinniartuata aappaata Mikael Petersen- ip suli aalajangiusimavaa, Siumup naalakkersuisoqarfiit sisamat tigussagai, kiisalu Atassut Inuit Ataqatigiillu tamarmik immikkut marlunnik tigusissasut.
- Tassa taamaassaaq. Sooq aamma Inuit Ataqatigiit naalaakkersuisoqarfinnik pingasunik pissappat arfineq-marluinnarnik qinigaatitaqarlutik, Mikael Petersen oqarpoq.
Inuit Ataqatigiit siulittaasuat Josef Motzfeldt ippassaq oqarpoq, nalakkersuisoqarfiit isumaqatigiinniutigineqassasut, akuerineqarsinnaangitsorlu Siumup sisamanik naalaakkersuisuutitaqarnissaa.
Inuit Ataqatigiit sinnerlugit isumaqatigiinniaqataasoq Kuupik Kleist apeqqut pillugu oqaaseqarumanngilaq, Atassummeersorli Steffen Silassen oqarpoq, partiimi suli apeqqut eqqartorneqanngitsoq.
Siumup siulittaasua Hans Enoksen oqarpoq, naalakkersuisoqarfiit amerlassusissaat kikkullu inissinneqarumaarnersut oqaloqatigiinnerit ingerlareertut naammassereerpata tikinneqarumaartut.