Naalakkersuisoq ulloq unnuarlu angerlarsimaffiit pillugit: Isumalluarpunga
Kommunit meeqqanut angerlarsimaffiup avataanut inissinneqartussanut naleqquttunik neqerooruteqartarnermikkut ilungersuasarput.
Tassa meeqqat ilai ulloq unnuarlu angerlarsimaffimmut immikkut ittumik isumaginninnermik sullissiviusartumut inissinneqarpata pitsaanerugaluartoq ilaqutariinnut inissinneqartariaqartarput. Tassa imaappoq, ilaqutariit meeqqamik inissiiviusimasut ilai meeqqamik inissiivigineqareernertik kingornagut sapiliinnartarput.
- Meeqqat ilai immikkut ittumik isumagineqarnissaminnik pisariaqartitsisarnerat ilumoorpoq, pisariaqartitaalli massakkorpiaq tunniunneqarsinnaanngillat, Isumaginninnermut Naalakkersuisoq Martha Abelsen (S) oqarpoq.
AAMMA ATUARUK Ulloq unnuarlu angerlarsimaffiit inissaalatsinerat meeqqat sumiginnakkat amerlinerannik kinguneqartoq
Ulloq unnuarlu angerlarsimaffiit meeqqat pisariaqartitaat pillugit ilinniarsimasunik sulisussaaleqisarnerat ajornartorsiutaavoq. Ajornartorsiut tamanna Danmarkimit ilaannikkut suliartortitsinikkut aaqqiivigineqartarpoq.
- Meeqqanut taakkununnga sullissisussanik avataaniit tikisitsiuaannartarsinnaanngilagut. Meeqqanik taakkuninnga sullissisartut piginnaasaannik ataavartumik qaffassaaneq pillugu suleqatigiittoqaleruttortoq, naalakkersuisoq oqarpoq.
Tamatumunnga atatillugu ineriartortitsiuartoqarsinnartoq, Martha Abelsenip erseqqissaatigaa. Innuttaasut politikerillu meeqqanik ikiuinerusoqartalernissaa ukkatileraangassuk soorlu init inissiiviusussat amerlanerusut pisariaqartinneqalertarput:
- Meeqqat kommunilluunniiit ilai ilaginnaannarnagit meeqqamut ilaqutaanullu pitsaanerpaamik aaqqiissuteqaqatatigiinnissatsinnut suleqatigiittuarsinnaratta kommuninik oqaloqateqartarnerput pissutigalugu isumalluarpunga.
AAMMA ATUARUK Meeqqat sumiginnakkat pillugit nalunaarusiaq: Isumaginnittoqarfiup kisimiilluni suliassaq isumagisinnaanngilaa
Abelsenip oqarnera naapertorlugu ilaqutariit meeqqamik inissiiviusimasut suliassarujussuarmik naammassinnissinnaasannginnerannut unammillernartut naalakkersuisunit aamma aaqqiiviginiarneqaleruttorput:
- Tamatumammi aaqqiiviginissaa Danmarkimik suleqateqarnitsinni iliuuseqarfigisassat ilagaat, tassa ilaqutariit meeqqamik inissiiviusimasut piginnaasaannik qaffassaaneq.
Kommunit ilaqutariit meeqqamik inissiiviusimasut sumik ilinniagaqarnissamik meerarsiartilluunniit pillugu sutigut tapersersorneqarnissamik pisariaqartitsinersut paasisaqarfiginissaat anguniarlugu toqqaannartumik atassuteqaqateqarnerusalernissaat aamma sulissutigineqartut ilagaat.