Ulloq unnuarlu angerlarsimaffiit inissaalatsinerat meeqqat sumiginnakkat amerlinerannik kinguneqartoq
Ulloq unnuarlu angerlarsimaffiit meeqqanut inuusuttuaqqanullu sumiginnakkanut ininik 90-inik inissiiviusartussanik amigaateqarnerat Isumaginninnermut Aqutsisoqarfiup siorna nalunaarusiamini ilisimatitsissutigaa. Tamanna Isumaginninnermut Naalakkersuisoqarfiup suliatigut qaangiuttoorneranik malitseqarpoq, ininillu nutaanik 46-nik nunatsinni sumiiffinni assigiinngitsuni ukioq manna pilersitsilluni.
Paasissutissat piviusut:
Isumaginninnermut Aqutsisoqarfiup Aningaasaqarnermut Naalakkersuisoqarfimmut nalunaarusiaani 2018-imi juulip qaammataani saqqummiussami - KNR-imit pissarsiarineqartumi - allassimavoq, ulloq unnuarlu angerlarsimaffiit ininik 40-nik meeqqanut inuusuttuaqqanullu angerlarsimaffiup avataanut inissinneqartussatut innersuunneqarsimasunut inissiigasuarfiusussanik amigaateqartut.
Tamannalu ilutigalugu meeqqanut angerlarsimaffiup avataanut inissinneqartussanut inissat 50-it meeqqanullu angerlarsimaffiup avataanut inissinneqarallartussanut inissat 40-t - tassa inissat katillugit 90-it - amigaatigineqartut nalilerneqarpoq.
Ininik nutaanik katillugit 30-nik ininillu arfinilinnik inissiiviugallartartussanik ulloq unnuarlu angerlarsimaffinni Namminersorlutik Oqartussanit pigineqartuni ukioq manna pilersitsisoqarsimasoq Isumaginninnermut Naalakkersuisoqarfiup KNR-imut juulip ulluisa 31-anni ilisimatitsissutigaa. Kisitsisillu novembarip ulluisa 28-anni pissarsiat naapertorlugit angerlarsimaffiup avataanut inissinneqartussanut inissat katillugit 46-sut inissinneqarallartussanullu inissat arfiniliusut sumiiffinni ukunani agguataarneqarsimapput:
Qaqortumi init qulit.
Sisimiuni nunaqarfiinilu meeqqanut inuusuttuaqqqanullu init inissiiviusartussat 18-it taamatuttaaq inuusuttunut inissiat arfineq-pingasut inillu inissiiviugallartartussat pingasut.
Nuummi meeqqanut ukioqanngitsuniit pingasunik ukiulinnut init inissiiviusartussat arfinillit taamatuttaaq ulloq unnuarlu angerlarsimaffik namminersortoq suleqatigalugu meeqqanut init inissiiviusartussat sisamat.
Ilulissani init inissiiviugallartartussat pingasut.
Tasiilami ulloq unnuarlu angerlarsimaffiit aamma inissaalatsipput, taakkununngali sulisussarsiornerit taakkunanilu sulisut sulisoriinnarnissaat ajornartorsiutaasarmata Naalakkersuisut aalajangernikuupput Tasiilami ininik nutaanik pilersitsisoqassanngitsoq. Tassa imaappoq, Tasiilami meeqqat sineriammi sumiiffinnut allanut inissinneqarnissaminnut innersuunneqartarput.
Meeqqanut skixofrenertunut ininik inissiiviusartussanik arfinilinnik pilersitsisoqarnissaa sulissutigineqaleruttortoq, aamma ulloq unnuarlu angerlarsimaffinni init 37 missaannik ilaneqarnissaat pilersaarutaasoq, Isumaginninnermut Aqutsisoqarfiup ilisimatitsissutigaa.
Meeqqanik inimut innersuunneqarnissamut maanna utaqqisuniittoqanngitsoq, Isumaginninnermut Aqutsisoqarfiup KNR-imut ilisimatitsissutigaa. Nunatsinnili ulloq unnuarlu angerlarsimaffinni init 160-isut tamarmik atorneqartut, Ilaqutariinnermut Peqqissutsimullu Ataatsimiititaliamut nalunaarusiami uppernarsarneqarpoq.
Taamaattumik kommunit ulloq unnuarlu angerlarsimaffiit meeqqanik nappaatilinnik passuttariaqartorujussuarnillu sullissiviusinnaasut inissaalatsiuarnerat pissutigalugu meeqqanik angerlarsimaffiup avataanut inissinneqartussanik inissiilertortariaqartarput.
Kommuneqarfik Sermersuup Oqartussaaffeqarfiani ingerlatsisup, Peter Brix Adsersenip, ajornartorsiut tamanna arajutsisimanngilaa.
- Ulloq unnuarlu angerlarsimaffiit inissaalatsisarnerat ajornartorsiutigiuarsinnarparput, ajornartorsiullu tamanna nunatsinni tamarmi atuuppoq, Peter Brix Adsersen oqarpoq.
Peter Brix Adsersenip oqarnera naapertorlugu Inatsisartut meeqqat tapersersorneqarnissaannut inatsisaat 2017-imeersoq atuutilereersorlu nalunaarusianik pitsaanerusumik qulaajaasoqartalernerata ilutigisaanik ulloq unnuarlu angerlarsimaffiit pisariaqartinneqarneruleraluttuinnarput. Meeqqalli angerlarsimaffiup avataanut inissinneqartussat arfineq-pingasut qulillu akornanniissanganeragai ulloq unnuarlu angerlarsimaffinni naleqquttuni inissaqartinneqanngitsut oqaatigaa.
Tamatumunnga atatillugu ajornartorsiutit aaqqiivigineqarnissaat ulapputigineqaleruttortoq, Peqqissutsimut, Isumaginninnermut Inatsisinillu Atuutsitsinermut Naalakkersuisup, Martha Abelsenip, erseqqissaatigaa.
- Ajornartorsiutit aaqqiivigineqarnissaannik ukkassisoqarnera eqqarsaatigalugu suliatigut angummassinnaaleqqikkumaartugut qularinngilara, taanna oqarpoq.
Kommunip sulianik pilertornerusumik ingerlatsisalernera Oqartussaaffeqarfimmi ingerlatsisup, Peter Brix Adsersenip nunannaarutigaa, inissaalatsileraangatali meeqqanik ilaqutariinnut suliassaminnik naammassinnissaanngitsunut inissiigallartarnerit isumatusaannginnermik tuaviupiluussamillu aalajangiinernik aallaaveqartartut aamma erseqqissarpaa.
- Ilaqutariit meeqqamik inissiiviusimasut suliassiissutinik naammassinninnissaminnut piginnaasaqannginnerat ajornartorsiutaavoq. Meeqqanik ajornartorsiortorujussuarnik sukumiisumillu sullinneqarnissamik pisariaqartitsisorujussuarnik isumaginninnissaminnut sillimanngillat, Peter Brix Adsersen oqarpoq.
Ilaqutariit meeqqamik inissiiviusimasut sapiliinnartartut
Ilaqutariit meeqqamik inissiiviusimasut meeqqamik inissiivigineqareernermi kingunitsiannguagut ajornartorsiulikkajuttarmata sapiliinnartarput, tamannalu meeqqap allamut inissinneqarnissaminut oqartussaasunit sullinneqaqqilerneranik kinguneqartarpoq. Kommuneqarfik Sermersoorlu ilaqutariit meeqqamik inissiiviusimasut meeraq qitornarsiarisartik allamut nuunneqarnissaanut qinnuteqarsimasut pillugit suliat marluk sapaatip-akunnerata siuliani ingerlappai.
Ilaqutariinnik meeqqamik inissiiviusimasunik pikkorissunik, pimoorussisunik meeqqanullu sapinngisamik pitsaanerpaamik ikiuussinnaasunik amerlasuunik peqartoq, ilaqutariillu taakku ulloq unnuarlu angerlarsimaffiit inissaalatsinerat pissutigalugu meeqqamik inissiiviusariaqarsimasut, Oqartussaaffeqarfimmi ingerlatsisup erseqqissaatigaa.
- Meeqqat ulloq unnuarlu angerlarsimaffinnut inissinneqarfissaagaluaminnut inississinnaanngikkaangatsigit ilaqutariinnut inissittariaqartarpavut, Peter Brix Adsersen oqarpoq nangillunilu:
- Taamaattumik meeqqat angajoqqaaminni najugaqarsinnaannginnertik saniatigut ilaqutariinnit allanit aamma inissaqartitaanngitsutut misigisimasarput. Tamanna meeqqanut allamik annikilliuuteqalersitsineruvoq. Meeqqammi taama nalaatsisut ilaquttaminniit ajattugaasutut inuluugineqartutulluunniit misigisimareersuusarmata taamatorpiaq nalaataqaqqittutut immaqa misigisimasarput, Peter Brix Adsersen oqarpoq.
Naalakkersuisulli tamatumunnga atatillugu aamma pitsanngorsaaleruttortut, Naalakkersuisup Martha Abelsenip erseqissarpaa.
- Ulloq unnuarlu angerlarsimaffiit ukkatarinerisa saniasigut ilaqutariit meeqqamik inissiiviusartut tamarmik taakkulu piginnaasaannik qaffassaaneq aamma ukkataraavut. Meeqqat allamut nuunneqartarnerisa minnerpaaffissaaniitinnissaat anguniarparput, taanna oqarpoq.
Piumasaq: Pitsaanerusumik naleqqiusseriaaseqartoqartalerli
Oqartussaasoqarfimmi ingerlatsisup inissiisussanngornermi suleriutsit allanngortinneqartariaqarsorai.
- Perorsaasut meeqqanik alaatsinaannerat meeqqallu pillugit nassuiaataat tunngavigilluinnarlugit ulloq unnuarlu angerlarsimaffinnut inissiisoqartalernissaa pisariaqarsoraara, Peter Brix Adsersen oqarpoq.
Taassumalu oqarnera naapertorlugu periuseq tamanna atuutilersinneqarpat meeqqat atukkatigut sunik nalaataqarsimanersut paasisaqarfiunerulissapput, tamannalu ilutigalugu inissinneqarnissaannut pitsaanerusumik innersuunneqartalissapput. Meeqqallu ilaqutariinnut inissinneqartussanngortariaqassappata sutigut tapersersorneqarnissaminnik pisariaqartitsinerannik erseqqissarneqartalissaaq. Taamaalilluni ilaqutariinnik meeqqanillu aallaqqaataaniilli naleqqiussilluartoqarnissaa qulakkeerneqarsinnaassammat.
Inatsisartut meeqqat tapersersorneqarnissaannut inatsisaat 2017-imeersoq naapertorlugu Naalakkersuisut ulloq unnuarlu angerlarsimaffiit naammattunik inissaqartitsinissaannik qulakkeerisussaapput.
