VIDEO Naalakkersuisoq: Raajartassat ikilileriffigineqarnerinut taartissanik misissuisoqarpoq
- Soorunami, pingaartumik sinerissap qanittuani, raajarniarnermi ingerlataqartunut sunniuteqarnerlussinnaanera taanna qularutissaanngilaq. Tamanna pinngitsoortinniarlugu sinerissap qanittuani raajarniartut oqaloqatigisaqattaarpagut alloriarfissaat suussanersut pillugit.
- Raajartassanik ukiup aallartinnerani appaasariaqarsimanitsinnut toqqammaviuvoq, qineqqusaarnitsinni aammalu tunngaviusumik naalakkersuisooqatigiinnissamik isumaqatigiissutitta aallaavigisaanik atuisut peqatigalugit naalakkersuinikkut ingerlatsinissarput, Aalisarnermut naalakkersuisoq Karl-Kristian Kruse KNR-imut oqarpoq.
AAMMA ATUARUK Raajartassiissutit ikilineqarneri Aalisarnermut ataatsimiititaliap apeqquserai
Inatsisartut Aalisarnermut, Piniarnermut Nunalerinermullu Ataatsimiititaliaanni siulittaasup Nikolaj Jeremiassenip (S) ilaatigut oqaatigaa nunatsinni imartaq annertoorujussuaq atorneqanngitsoq qineqqusaarnermi taakkartorneqartoq.
- Taamatut appaanerup malitsigisaanik aalisartut alloriarfissaat pillugit oqaloqatigineranni, pisassiissutaasut aalisarfinnik aallaaveqarput, aalisarfinnilu appaassutigineqartut aalisartut namminneerlutik oqariartuutigivaat, ukiuni 20-ni aalisarnerminni massakkut qaqittakkatik 50 procentimut allaat inissinnerat aallaavigalugu tapersersorlugit, taamatut appaaniarneq.
- Kisianni naalakkersuinikkut uniinnanngilagut, aalisarfiunngitsut sineriatsinni imartani misileraanikkut raajarniarnikkut massakkut atuiffigineqarnissaat misissorlugillu atuisut oqaloqatigineqarput tamakku pillugit, naalakkersuisoq oqarpoq.
AAMMA ATUARUK Raajartassiissutit ikilineqarneri raajarniat ilaasa akiliisinnaajunnaarnerannik kinguneqarsinnaasoq
Aalisartut aammalu Inatsisartut aalisarnermut ataatsimiititaliaminngaanniit oqaatigineqarpoq 14 procentinik appaasoqarpat akiliisinnaajunnaartoqarsinnaanera aarleqqutigineqartoq. Taakkua akiliisinnaajunnaassagaluarpata, taava qanoq iliortoqassava?
- Soorunami tamanna neriuutiginngilarput, aamma tamanna pinngitsoortinniarlugu sinerissap qanittuani raajarniartut oqaloqatigivagut, kisianni annerusumik avataani raajarniarnermut sunniuteqassanngitsoq massakkumut qulakkeerparput. Tassa akit avataani raajarniarnermi pitsaasumik inissisimapput, kisianni oqareernittut aamma sinerissap qanittuani kingunerluutigisinnaasai pillugit raajarniartut sinerissap qanittuani massakkut oqaloqatigisaqattaarpagut aammalu aalisarnikkut allanik tulaassuisinnaanerannik periarfissat suussanersut aamma oqaloqatigiinnitsinni aallaavigivagut, taamaattorli aalisarnermut ataatsimiititaliap raajartassat pillugit massakkut aaqqiissuteqarnissaminnik siunertaqarnerat immini akornutissaqanngilaq, Inatsisartut suleriaasiat malillugu tamanna ingerlaguni, taamaattorli politikkikkut sulinermi Inatsisartut Naalakkersuisullu akunnerminni, uanga sulininni sulineq pitsaasumik ingerlassappat, toqqarlunga allakkatigut apuussisarnissaq aamma pingaarpoq, Aalisarnermut, piniarnermut nunalerinermullu naalakkersuisoq, Karl-Kristian Kruse taama oqarpoq.
