Raajartassiissutit ikilineqarneri Aalisarnermut ataatsimiititaliap apeqquserai

Kitaani raajartassat 73.000 tonsinut ikilineqarnissaannut aalajangertoqarneratigut, ukioq manna raajartassat siorna 2014-imut naleqqiullugu 14 procentinik ikilineqartussanngorput, taamatullu aalajangertoqarnera inuussutissarsiummut kinguneqarnissaa Aalisarnermut Ataatsimiititaliap ernummatigaa.

- Raajartassat taama amerlatigisumik ikileriarnerat suliassaqartitsinermut aammalu tunisassiorfiit atuuttut attatiinnarneqarnissaannut periarfissamut sunniuteqarnissaat aarleqqutigineqarpoq, tamannalu ataatsimut isigalugu inuppassuit ulluinnarni raajarniarnermik raajanilluunniit suliareqqiinermik inuussutissarsiuteqartut aningaasaqarnerannik qajannarsisitsissaaq, Nikolaj Jeremiassen, Siumumeersoq, Inatsisartullu Aalisarnermut, Piniarnermut Nunalerinermullu Ataatsimiititaliaanni siulittaasoq tusagasiuutinut nalunaarummi ilaatigut allaaserisaqarpoq.

Uumasoqassutsimik immikkut ilisimasallit siunnersuinerat tusaanngitsuusaarneqarsinnaanngitsoq, Ataatsimiititaliap paasisinnaanerarpaa, Kalaallit Nunaatami kitaani raajat MSC-mit nalunaaqutsersorneqarnerata attatiinnarneqarnissaa inuussutissarsiummut Kalaallit Nunaannullu tamarmut pingaaruteqartoq, Ataatsimiititaliaq isumaqarpoq.

AAMMA ATUARUK Raajartassiissutit ikilineqarneri raajarniat ilaasa akiliisinnaajunnaarnerannik kinguneqarsinnaasoq

- Ataatsimiititaliamiilli oqaatigineqassaaq uumasoqassutsimik ilisimasallit siunnersuinerat raajarniat raajartassat annertussusiannik siammasissusiannillu naliliinerannit allaanerummat, Nikolaj Jeremiaassen ilaatigut allappoq, naalakkersuisoqatigiinnissamullu isumaqatigiissut Ataatsimiititaliamit nuannaarutigineqarnera eqqaasitsissutigalugu:

- Naalakkersuisut kissaatigigaat "uumasoqassutsimik ilisimasallit aalisartullu naligiimmik toqqammavigineqassasut, pingaartumik paasissutissat aalajangersarneqarnerini tassani allassimammat, Ataatsimiititaliaq allappoq.

Massakkut inissisimaneq ataatsimiititaliamit assut ilungersunartutut nalilerneqarpoq, 2015-ip raajarniarnermik inuussutissarsiuteqartunut ajornartorsiorfiunissaa qularineqarani:

- Taamaattumik raajartassat annikilleriarujussuarnerat oqallisiginiarlugu Aalisarnermut, Piniarnermut Nunalerinermullu Naalakkersuisoq apersorneqarnissamut aggersarneqassasoq ataatsimiititaliamit aalajangerneqarpoq, Nikolaj Jeremiassen, ataatsimiititaliaq sinnerlugu naggasiilluni ilaatigut allaaserisaqarpoq.