Naalakkersuisoq: Pinngortitaleriffiup nalunaarutaa tupaallaatigaara
Tunumi qilalukkanik nutaamik kisitsisoqassappat, allamik siunnersuisoqarnissaa ilimananngilaq.
Pinngortileriffimmit Inatsisartuni sapaatip akunnerata siuliani oqallinneq sioqqullugu taama nalunaaruteqarput.
AAMMA ATUARUK Naalakkersuisut qilalukkanik pisassiissutit biologinit siunnersuinerup akerlerilluinnagaanik ilavaat
Taamalu nalunaarneq aalisarnermut piniarnermullu naalakkersuisup Aqqaluaq B. Egedep tupaallaatigaa.
- Pinngortitaleriffiup misissuinerit annertunerusut ingerlagaluarpataluunniit pisassiissutinik qaffaaqqinnginnissamik oqariartuuteqarnera tupaallaatigivara, Aqqaluaq B. Egede oqarpoq, nangillunilu.
- Naalakkersuisuni tunngavilersuutigisimasara tassaavoq, assersuutigalugu qilalukkat 100-ppata, 70-it amerliartortitassatut immikkoortinneqartarput, 30-t pisassiissutigineqarlutik.
Qilalukkat qernertat Tunumi ikileriarput
2008-mi kisitsineq aallaavigalugu, Ittoqqortoormiini qilalukkat qernertat 2000-it missaanniinnissaat biologit naatsorsuutigaat. 2017-imi taamaallaat qernertat 300-t missaanniipput.
Kangerlussuarmi qilalukkat qernertat 2008-mi 600-t missaanniit 2016-imi 300-t missaannut ikileriarsimapput. Tasiilami suli ikinnerupput.
Aasaanerani Ittoqqortoormiini, Kangerlussuarmi Tasiilamilu qilalukkanik qernertanik kisitsineq, ataatsimiinnerit, piniartut peqataatinneri misissueqqissaarnerillu ilanngullugit, 3.1 miliuuni koruuneqartoq, Pinngortitaleriffiup naatsorsuutigaa.
Pinngortitaleriffiup aamma uparuarpaa, taamatut kisitsinissaq aningaasanut inatsimmi Pinngortitaleriffiup annerusumik aningaasaliiffigineqarneranik imaluunniit iliuuseriniakkat pilersaarutaareersut pingaarnersiornerisa allanngortiternissaannik kinguneqartariaqartoq.
Najoqqutarisaq: Pinngortitaleriffimmi Miluumasunut Timmissanullu immikkoortortaqarfik
Pinngortitaleriffilli naapertorlugu, tamanna attanneqarsinnaasumik piniarnerunngilaq.
- Qilalukkat kangerlummi 100-ppataluunniit attanneqarsinnaasumik piniarneqarsinnaanissaannut naammanngillat, Pinngortitaleriffimmi miluumasunut timmissanullu immikkoortortami pisortaq, Fernando Ugarte KNR-imut siusinnerusukkut oqarpoq.
Taanna naapertorlugu qilalukkat attanneqarsinnaasumik piniarneqassagunik hunnorujulikkuutaasariaqarput.
Qilalukkat ikinnerusut immikkullu pisassiissuteqarneq
Biologit naapertorlugit, Tunumi qilalukkat ikileriarujussuarsimapput.
Assersuutigalugu Pinngortitaleriffiup 2008-mi naatsorsorpaa, Ittoqqortoormiini qilalukkat 2000-it missaanniittut. 2017-imili 300-sut naatsorsorneqarpoq.
Tunumi qilalukkat eqqissisimatinneqarnissaat Pinngortitaleriffik siunnersuereerpoq.
Naalakkersuisulli qilalugartassiissutit Tasiilami 15-inik Ittoqqortoormiinilu tallimanik ilallugit qaammat manna nalunaarutigaat.
AAMMA ATUARUK Politikkikkut amerlanerussuteqartut qilalukkat nutaamik kisinneqarnissaannut aningaasaliiniartut
Ittoqqortoormiini qilalugartassiissutit tallimanik ilaneqarnerat sioqqullugu Ittoqqortoormiini piniartut qilalukkanik 29-inik ukiup naannginnerani pisaqarsinnaapput. Marluinnaalli tassani maannamut pisarineqarsimapput.
- Tunumi aammalu avanersuarmi periarfissiinerput, Ittoqqortoormiini immikkut iliorusunnata taamatut assinganik annikinnerungaatsiaralurtumik pisassanik ilasilaarnikuuvugut, Aalisarnermut piniarnermullu naalakkersuisoq, Aqqaluaq B. Egede Aviaaja Killimemut oqarpoq.
Naalakkersuisut aamma Qaanaami qilalugartassiissutit 20-nik ilasimagaat taassuma innersuussutigaa.
Aasaanerani Ittoqqortoormiini, Kangerlussuarmi Tasiilamilu qilalukkanik qernertanik kisitsineq, ataatsimiinnerit, piniartut peqataatinneri misissueqqissaarnerillu ilanngullugit, 3.1 miliuuni koruuneqartoq, Pinngortitaleriffiup naatsorsuutigaa.
Qilalukkat kisinneqaqqinnissaannut siunnersuut Ukiakkut ataatsimiinnermi siullermeerneqarmat partiit amerlanerussuteqartut nutaamik kisitsinissamut aningaasanut inatsimmut aningaasanik immikkoortitsinissaq taperserpaat.
