Naalakkersuisooqatigiit suleqatigiissuseqarusunnissaat IA-mit neriuutigineqartoq
- Naalakkersuisooqatigiilersut pilluaqquagut. Aamma aningaasaqarnerput siumut-saatsissinnaassagaat neriuutigaarput.
- Naalakkersuisooqatigiit politikkikkut sulianut illuatungiliuttunik peqataatitserusunnissaat aamma neriuutigaarput.
- Inuit Ataqatigiinnit aaqqissuusseqqinnissat pisariaqartut oqaloqatigiissutiginissaannut aammalu aningaasanut inatsisissap nutaap suliarineqarneranut atatillugu akisussaaqataanissatsinnut piareersimavugut, partiimi siulittaasup tullia KNR-imut oqarpoq.
Inuttalersuineq pitsaasoqarlunilu pitsaanngitsortaqarpoq
Naalakkersuisunut ilaasortaasimasut arlallit novembarip 28-anut atatillugu qinersisartunit qinigaanngitsoorput. Nutaarpassuit aamma inatsisartuni suliassaqarluassapput.
- Inuiaqatigiinni aaqqissuusseqinnerit pisariaqartut ingerlanneqarnissaat ukiuni kingullerni sulissutigaarput. Maanna inuttalersuisoqarpat, immaqa suliamut ilisimasaqarpallaanngitsunik, tamannalu immini arlalitsigut aarlerinartortaqarsinnaavoq.
Aamma atuaruk IA-p Demokraatillu Sermersuumi suleqatigiinnertik ingerlatiinnassavaat
- Inuit Ataqatigiinnit isumaqarpugut aaqqiissutissanik nutaanik ujartuinissamut piffissanngorpoq. Politikerit pisoqqat Naalakkersuisunut ilaasortanit nutaanit taarserneqarnerat pitsaasumik sunniuteqarsinnaavoq.
- Nutaartaasut politikkikkut suliaqarnermi pitsaasunik allanngueqataaratarsinnaapput aammalu isumassarsianik nutaanik saqqummiussaqarlutik peqatigisaanillu suna qanorliu pingaarnersiorneqassanersoq paasillugu, Aqqaluaq B. Egede oqarpoq.
Inuit Ataqatigiit Inatsisartuni aqqanilinnik ilaasortaartitaqartoq suleqatigiinnissamut piareersimanerarpoq.