Naalagaaffeqatigiinnerup atuartitsissutigineqarnissaa danskit ministeriata kissaatigaa
Danmarkimi atuartut Naalagaaffeqatigiinnermi pissutsit pillugit annerusumik ilisimasaqalertariaqarput.
Ilinniartitsissutigineqartussatut siunniussat takoreerlugit Danmarkimi ilinniartitaanermut ministeri Ellen Trane Nørby (V) taama isumaqarpoq.
- Nunat avannarliit pillugit ilinniartitsisoqartarnissaa anguniakkanut massakkut ilaavoq, Naalagaaffeqatigiinnerlu pillugu annerusumik aamma ilinniartitsisoqartarnissaa anguniarneqartariaqartoq isumaqarpunga.
- Ministeritut tamanna sulissutiginiarpara, Nunammi avannarliit ilinniartitsissutigineqartarnissaannut atatillugu Naalagaaffeqatigiinnerup Nunanut avannarlernut sanilliullugu annerusumik ilaatinneqannginnera tupaallaatigaara, Ilinniartitaanermut ministeri Ellen Trane Nørby KNR-imut oqarpoq.
AAMMA ATUARUK Kalaallit Nunaat pillugu ilinniartitsisarnerup sukateriffigineqarnissaa siunnersuutigineqarpoq
Ilikkagassatut anguniagalersortoqassanngilaq
Kalaallit Nunaata Danmarkillu akornanni pissutsit pillugit Danmarkimi meeqqat atuarfianni annerusumik ilinniartitsisoqartalernissaa, Inuttut pisinnaatitaaffiit pillugit Institutip ujartorpaa, suullu ilinniartitsissutigineqassanersut ministerip sulissutigisariaqarpaa, Instituti oqarpoq.
Kalaallit Danmarkimiittut kulturertik pissutigalugu isummanik pigiliutiinnakkanik misigitinneqartarnerisa annikillisarnissaanut iluaqutaasinnaassasoq neriuutigineqarpoq.
Danmarkimili meeqqat atuarfiat ullumikkut taama ingerlanneqanngilaq, Ellen Trane Nørby erseqqissaavoq.
- Ilinniartitsup ataatsip meeqqat atuarfiat pillugu isumaqatigiissutigineqarsimanersut aallaavigalugit suut ilinniartitsissutigisassanerai uanga ministeritut aalajangiiffigisussaanngilara, suut ilinniartitsissutigineqassanersut, suullu ilinniartitsissutigineqassannginnersut aalakangiiffigisussaanagu, Ellen Trane Nørby oqarpoq.
AAMMA ATUARUK Naalagaaffeqatigiinneq pillugu immikkut ittunik ilikkagassatut anguniagalersortoqassanngilaq
Aaqqissuusseqqinneq siammasissunik killiussaqartitsissaaq
Danmarkimi meeqqat atuarfiannik aaqqissuusseqinneq siorna atuutilersinneqartoq naapertorlugu, ilinniartitsisut atuarfiilluunniit ataasiakkaat assersuutigalugu nunat allat oqaluttuarisaanerat pillugu qanoq annertutigisumik qanorlu atuartitsisoqassanersoq siornatigumut naleqqiullugu nammineerlutik aalajangersinnaanngorpaat.
Taamaammat aamma naalagaaffeqatigiinnerup oqaluttuarisaanera pillugu atuartitsinissaq nalunaaquttap akunnerinik qassinik sivisussuseqassanersoq ministerip kisitsisitalerusunngilaa.
- Oqaluttuarisaaneq pillugu atuartitsinermut allamut, danskit nunallu allanut oqaluttuarisaanerannut tunngatillugu aamma uagut aalajangertussaanngilarput tamanna qanoq sivisutigissanersoq, Ellen Trane Nørby oqarpoq.
Folketingimi Siumup Inuit Ataqatigiillu Inuttut pisinnaatitaaffiit pillugit Instituttip saqqummiussaa taperserpaat, Socialdemokratilli Danmarkimilu Ilinniartitsisut Peqatigiiffiata akerleralugu.
Ilinniartitaanermut ministerip Folketingimi partiini tapersersortissarsiorumavoq ilikkagassatut anguniagassanik pingaarnernik nutarterisoqaqqilerpat 'naalagaaffeqatigiinneq' ilanngutsikkumallugu. Tamannali qaqugorpiaq pissanersoq nalunarallartoq ministeri ilisimatitsivoq.
