Angajoqqaanut kalaaliusunut meeqqaminnik arsaagaasimasunut qitornavissianngortitaasimasunulluunniit naapittarfimmik misigissutsikkullu oqilisaasinnaasumik oqaloqatigiittarfiliortoqarnissaa pingaaruteqarpoq.  

Peqatigiiffik Sila360, angajoqqaanut ukiup affaata tulliuttup ingerlanerani sisamariarluni aaqqissuussaqarniartoq, taama isumaqarpoq.

- Arlaannarpulluunniit meeqqap allami peroriartornissaa siunertaralugu meerartaarneq ajorpoq. Meerarisamik arsaagaaneq tamatigut annernartorujussuusarpoq, inuup misigissusaanut eqquisarluni imminullu tatigiunnaarsitsisarluni. Tamanna misigissutsinut assut atuisartorujussuuvoq, Annette Broberg tarnip pissusianik ilisimasalik aaqqissuussinermullu attuumassutilik taama oqarpoq.

Aaqqissuussineq siulleq Odensemi Kalaallit Illuutaanni arfininngorpat pissaaq.

Meeqqamik arsaarneqarnerup qanoq misiginarnerata oqaluuserinissaa tassani periarfissaajumaarpoq qanorlu ingerlariaqqittoqarsinnaanera tamatuma kingorna oqaluuserineqassaaq.  

Aammattaaq qanoq ungasianit angajoqqaajusoqarsinnaanera, meeqqat sunik pisariaqartitsinersut pisariaqartitaannillu qanoq tunineqarsinnaanersut sammineqassaaq.

- Oqaluuserisat oqimaaqaat artornarlutillu, kisianni qanoq ililluta nukinnik pigeriikkatsinnik nassaarsinnaanerluta sammerusupparput qanorlu nukissaneqqissinnaanerluta, Annette Broberg oqarpoq.

Assingusunik isumalinnik naapitaqarneq

Annette Brobergip oqarnera naapertorlugu, meerarisap allamut inissinneqarnera qitornavissianngortitaaneraluunniit angajoqqaanut pisuusutut kanngunartutullu misiginarsinnaavoq. Taamaattumik ammasumik oqaloqatigiissutiginissaa ajornakusoorsinnaavoq.

Aammattaaq meeqqat allamut inissinneqarnerata kingunerisaanik ilungersunartut nutaat pilersinnaasarput.

Assersuutigalugu angajoqqaarsianik suleqateqarniarneq, kalaallit danskillu piorsarsimassutsikkut assigiinngissuteqartillugit ilungersunarsinnaavoq, tarnip pissusianik ilisimasalik nassuiaavoq.

- Assingusumik isumalinnut oqaloqatigiiffiussaaq nammineq misigisat aallaavigalugit naapiffiussalluni imminullu tarrarsoqatigiiffiusinnaassalluni.

- Danmarkimi immikkut ittumik allaffimmut tarnip pissusianilluunniit ilisimasalimmik oqaloqateqassagaanni oqaloqatigiinneq danskisut pissaaq. Immaqa aamma meeqqamut angajoqqaarsiat isumaginninnermiluunniit siunnersortit allatut paasinnissinnaapput, taamaattumillu assigiimmik aallaaveqarfiusumi oqaloqatigiittarfimmiinneq eqqissisimanarnerusinnaavoq, Annette Broberg oqarpoq.

Annette Broberg tarnip pissusianik ilisimasalittut namminersortutut Danmarkimi sulivoq. Taanna nunatsinni ukiuni 42-ni najugaqarlunilu sulivoq, siullermik perorsaasutut kingornalu tarnip pissusianik ilisimasalittut.  Assi © : Privatfoto

Aaqqissuussinerit tulliuttut suli ullulerneqanngillat.

Sila360-ip kalaallit Danmarkimiittut inatsisitigut isumannaatsuunissaat suliniutigaa. Innuttaasut inuuniarnikkut atugarliortut inatsisitigut siunnersorneqarnissaannut, Atlantikup Avannaani nunat aningaasaataannit 8 millionit koruunit ukiunut tulliuttunut sisamanut 2025-mi immikkoortinneqarput.

VISO-p paasissutissiinera naapertorlugu meeqqat inuusuttullu kalaallit 416-it missaanniittut Danmarkimi angerlarsimaffiup avataanut inissinneqarnikuupput.