Naalagaaffeqatigiinneq pillugu immikkut ittunik ilikkagassatut anguniagalersortoqassanngilaq
Peqatigiiffiup siulittaasua taama oqarpoq.
Nunatta Danmarkillu akornanni oqaluttuarisaanerup tigussaanerusumik Danmarkimi meeqqat atuarfianni atuartitsissutigineqartarnissaanik Inuttut pisinnaatitaaffiit pillugit ilisimatusarfiup siunnersuuteqareernerani taama qisuariaateqarpoq.
Danmarkimi Ilinniartitsisut Peqatigiiffiata eqqarsaat pitsaasutut isigigaluarpaa. Tamannali ilikkagassatut anguniagassat Folketingimit aalajangersarneqartut ikiorsiullugit pissanngitsoq, siulittaasup tullia Dorte Lange oqarpoq:
- Kulturinut allanut tunngatillugu atuartitsinissaq pitsaasuuvoq, taamaaliornikkummi atuartunit ilisimasaqarfigineqalissammata. Ilikkagassatulli anguniagassat ilinniartitsisunit atuartunillu ilusilersorneqanngitsut akerlerilluinnarpagut, siulittaasup tullia oqarpoq.
AAMMA ATUARUK Kalaallit Nunaat pillugu ilinniartitsisarnerup sukateriffigineqarnissaa siunnersuutigineqarpoq
Danmarkimi kalaallit najugaqartut tallimaagaangata ataatsip Nunatsinneersuunini pissutigalugu immikkoortitaanermik misigisaqartarneranik nalunaarusiami ersitsisoqarnerata kingorna Danmarkimi atuartut Kalaallit Nunaat pillugu atuartinneqartarnissaannik immikkut ittunik malittarisassiortoqarnissaa siunnersuutigineqarpoq.
Tamannalumi iliuuseqarfigineqartariaqarpoq - aamma meeqqat atuarfianni, Dorte Lange oqarpoq.
Taannali aamma isumaqarpoq ilinniartitsisut ilinniartitsinissaminnik piareersaanermut piffissaqarnerulersinnerisigut aammalu Kalaallit Nunaat pillugu ilinniartitsinerup sunik imaqarnissaanik oqaloqatigiissuteqarnerisigut pisariaqartoq.
Naalagaaffeqatigiinneq pillugu Danmarkimi meeqqat atuarfianni atuartitsinermut malittarisassat sukaterneqarnissaat Danmarkimi Socialdemokraatinit aamma itigartinneqarpoq.
