Assi: Simon Uldum

Naalagaaffeqatigiinnermut qaammasaqarnerulerneq, kiffaanngissuseqarneruneq Færingehavnimilu saliinissaq

’Nuannerpoq, unneqqariffiusoq isummanillu naapeqatigiiffiusoq’, taamak naalakkersuisut siulittaasuat, ministeriuneq lagmandilu marlunngornermi Savalimmiuni naalagaaffeqatigiit oqaluuserisakigatik naapinnertik oqaasertalerpaat

Naalagaaffeqatigiinneq pillugu Kim Kielsen, Savalimmiut lagmandiat, Aksel V. Johannesen-ip, ministeriunerullu Lars Løkke Rasmussen-ip naapittarnerat oqinneruleraluttuinnarput, tusagassiortunik katersortitsinermi Kielsen taamak oqarpoq.

Angutit pingasut arlaleriarlutik naapissimalereerput, imminnullu ilisarisimanerulersimanerat ataqqeqatigiinnerallu ersarinninngorsimanerarpaa.

Kalaallit Nunaanni, Savalimmiuni, Danmarkimilu inuusuttunut tamannaa aamma misigitikkusunnarpoq, imminnut ilinniarlutik, oqaluttuarisaanerminnik kultuuriminnillu avitseqatigiillutik, nunanilu pingasuni aquttut naalagaaffeqatigiit iluani,nunat akunnerminni naalagaaffeqatigiinnermut qaammaasaqarnerulernissaq pilersaarusiorniarlugu isumaqatigiipput.

AAMMA ATUARUK Danskere er ’privilegerede uvidende’ om Grønland

- Savalimmiuneereersimagaanni pisuunnguallannarlunilu nuannaarnarpoq, allanullu aamma misigitikkusunnaqaaq, pingaartumik Kalaallit Nunaanni, Savalimmiuni, Danmarkimilu inuusuttunut, tusagassiortunik katersortitsinermi Lars Løkke Rasmussen taamak oqarpoq.

Pilersaarusiaq qanoq imaqassanersoq suli nalunarpoq. Nunalli tamarmik immikkut qaammaassaqarnermut pilersaarusiap ilaa suliarissaagaat eqqarsaataavoq.

Politikerit pingasut nunat avannarliit siunnersuisoqatigiivisa oktobarimi ataatsimiinneranni naapeqqinnissaannut pilersaarusiap ilusissaa atorfilittanit maanna oqaluuserineqassaaq.

Nunanut allanut politikkinut tunngasuni kiffaanngissuseqarnerulernissaq inerneqanngilaq

Aamma nunanut allanut tunngasunut politikkimut tunngasuni oqartussaaffeqarnerulernissaq Kielsenip Johannesenillu kissaatigaat.

AAMMA ATUARUK Naalagaaffeqatigiinneq nutartissavarput

Nunanit pingasunit atorfilittat Danmarkip, Savalimmiut Kalaallit Nunaatalu suleqatigiinnissamik isumaqatigiissutiminni - DFG-mik isumaqatigiissummik taagorneqartumi - naalagaaffeqatigiit nunani tamalaani kiinnertarnerannut sinaakkutinik aalajangiisumi allanngortitsisoqarsinnaanersoq naalagaaffeqatigiinneq pillugu Danmarkimi 2017-imi ataatsimiittoqareerneraniilli misissorpaat. Misissuineq taanna suli naammassinngitsoq, Løkkep paasissutissiissutigaa.

Misissuinerli nunat pingasut siuttuisa Nunat Avannarliit Siunnersuisoqatigiivisa oktobarimi ataatsimiinnerannut atatillugu naapeqatigiinneranni sammineqarumaarpoq.

- Nunagut pingasut akornanni soqutigisagut siusinnerusukkut naapipput, naapeqqissinnaallutillu.

Nunagisatta pingasut akornanni soqutigisat assigiiffeqarsinnaannerat pisarnikuuvoq aamma pisarsinnaallutik. Aammattaaq ima pisoqarsinnaasarpoq Kalaallit Nunaat Savalimmiullu naalagaaffeqatigiit Danmarkiulluni, taakkualu sinnerlugit Danmarkip EU-mi ilaasortaalluni Kalaallit Nunaata Savalimmiullu soqutigisaat sammineqarlutik. Tamannalu nutarterneqarsinnaannginnersoq misissussavarput, Lars Løkke Rasmussen oqarpoq.

Kangerluarsoruseq: Namminersorlutik Oqartussat iliuuseqarnissaat Lagtingip utaqqigaa

2016-imi anguniagassatut nalunaarutaasimasoq Nuup kujataani Kangerluarsorutsimi, Savalimmiormiut aalisakkeriverisimasaanni saliisoqarnissamut Savalimmiormiut akisussaaffimmik tigusinerat, Kim Kielsenip aammalu Savalimmiuni Naalakkersuisut siulittaasuata immikkut ittumik oqaluuserivaat.

AAMMA ATUARUK Kangerluarsoruseq isaterneqarli

Savalimmiormiut illulianut sanaartukkanut attaveqaqatigiinnermullu tunngasunut oqartussaqarfiata Landsverkip nalunaarusiortitaani maajimi saqqummersumi erseqqissaatigineqarpoq sanaartukkat Kangerluarsorutsimi atoqqinneqarsinnaanngitsut. Taamaattumik tamakkerlugu salinneqartariaqartoq.

Savalimmiormiut inatsisartui saliinissamut aningaasaliisussaapput, taakkuli Namminersorlutik Oqartussani Pinngortitamut Avatangiisinullu Naalakkersuisoqarfiup qanoq saliinissamut iliuusissat kissaatigineraa utaqqineqartoq, Savalimmiuni Naalakkersuisut siulittaasuata Aksel V. Johannesenip oqaatigaa.

Savalimmiormiut Nunat Avannarliit Suleqatigiinnerannut ilaasortanngorusullutik kissaataat, Kalaallit Nunaat sinnerlugu Tuluit Nunaat Brexitip kingorna isumaqatiginiarneqarnera aammalu attaveqaqatigiinnermut tunngasunut nunanit allanit aningaasaliisarneq, oqaluuserisani annikitsumik eqqaaneqartut ilaraat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat