Løkke: Naalagaaffeqatigiinneq nutartissavarput
Savalimmiuni partiip Venstrep suleqataata Sambandspartiip arfininngormat ataatsimeersuarnerani taama nalunaaruteqarpoq, Sermitsiaq.AG taama allaaserisaqarpoq.
Danmarkip, Savalimmiut Kalaallit Nunaatalu suleqatigiinnissamik isumaqatigiissutiminni - DFG-mik isumaqatigiissummik taagorneqartumi - allanngortitsisoqarsinnaanersoq peqatigiillutik misissuleruttorpaat.
AAMMA ATUARUK Løkkep nunatsinni free associationeqalernissaa itigartitsissutigigaa
Løkkep ataatsimeersuarnermi erseqqissaatigaa naalagaaffeqatigiinni soqutigisat ilaat ullumikkut aporaaffiusinnaasut, naalagaaffeqatigiinnerlu atorunnaarsinngikkaluarlugu nunat akornanni suleqatigiinnikkut taakku aaqqiissuteqarfigineqarsinnaasut.
Suliamilu tassani Sambandspartiet pisariaqartinneqarpoq.
- Suliassaq kisimiilluta naammassisinnaanngilarput. Sambandspartiet naalagaaffeqatigiinnerup nutarternissaanut pingaarutilimmik inissisimavoq, Lars Løkke Rasmussen taama oqarpoq.
AAMMA ATUARUK Qinersisoqannginnerani inatsit nutarternissaat sulissutigaarput
Sambandspartiet Savalimmiuni ullumikkut illuatungiliuttuuvoq Lagtingimilu partiini kisiartaalluni naalagaaffeqatigiinnerup ingerlaannarnissaanik kissaateqartuulluni.
Partii aamma Savalimmiut namminerisaminnik tunngaviusumik inatsisissaannut missingiutaasumut, Savalimmiuni naalakkersuisut innuttaasunut taasissutiginiagaannut tapersiisimanngilaq.
