Løkkep nunatsinni free associationeqalernissaa itigartitsissutigigaa
Namminersornerup inatsisaata Kalaallit Nunaannullu namminersortumut aqqutissiuutaasinnaanera pissutigalugu taama aaqqiisoqarnissaa isumaqatiginngilaa.
Nunarsuarmi sumiiffinni assigiinngitsuni taama aaqqissuussiinerit atorneqarput, soorlu qeqertat anginngitsut naalagaaffiillu anginerusut akornanni taama aaqqissuussisoqartarpoq, illersornissamut isumaqatigiissuteqaraanni killormut ilinniakkanut peqqinnissaqarfimmullu ammaanneqartarlutik.
Taama pisoqarsinnaavoq qeqertap namminersortup nunanut allanut iliuuserisinnaasai killilersuiffiginngikkaluarlugit.
AAMMA ATUARUK Free Associationimik isumaqatigiissusiornissaq Aleqap kissaatigaa
Taamatulli aaqqissuussinissaq Kalaallit Nunaanni atorneqarsinnaanngilaq. Folketingimi tallimanngornermi oqallittoqarmat Lars Løkke Rasmussenip tamanna erseqqissaatigaa.
- Taamaaliornermi arlaatigut namminersornissap eqqartornissaanut patsisipalaajuvoq. Free associationimi tassaavoq nunat namminersortut akornanni isumaqatigiissut. Namminersortunngorniarluni aalajangeraanni siunissamut taanna takorluugaasinnaavoq.
Inuit Ataqatigiinneersup Aaja Chemnitz Larsenip apeqquteqarneranut taanna akissutaavoq. Taassuma erseqqissaatigaa Inuit Ataqatigiit free association eqqunnianngimmassuk, ministeriunerulli isumaa paaserusussimallugu.
AAMMA ATUARUK Namminiilivinnerup Danmarkimit ikiorsiissuteqartarneq unitsissavaa
- Oqartoqarsinnaavormi politikkikkut nutaamik isumaqatigiissuteqarnikkut namminersorneq free associationimik taarsernearsinnaasoq. Kisianni Kalaallit Nunaat sinnerlugu Danmark suli ingerlatarpassuaqarpoq.
Ministeriunerup arlaleriarluni siusinnerusukkut erseqqissaatigisimavaa Kalaallit Nunaat ingerlavissaminik toqqaasariaqartoq. Naalagaaffeqatigiinniiginnarluni tapiissutisisarlunilu.
Imaluunniit Kalaallit Nunaat namminersulersinnaavoq Danmarkillu ingerlatai 30-it tigullugit tapiissutillu pisarunnaarlugit. Kingullertulli eqqaasaq ungasinnguatsiaqisoq, ministeriuneq oqarpoq.
AAMMA ATUARUK Tunngaviusumik inatsisissaq pillugu isumalioqatigiissitap sulinini nangikkaa
- Maannakkorpiaq naalagaaffittut pituttorsimanngitsutut atugarissaarnerujussuaq akuerineqarsinnaavoq. Imaluunniit taassuma angunnginnerani aningaasaqarnermik allannguisunik aalajangersaanikkut taanna anguniarneqarsinnaalluni.
Siumumi ilaasortat taakkuupput siusinnerusukkut arlaleriarlutik Kalaallit Nunaannut free associationimik aaqqissuussisoqarnissaanik siunnersuuteqarsimasut.
AAMMA ATUARUK Kalaallit Nunaanni naammaginanngitsumik ingerlatsisoqarpoq
