Free Associationimik isumaqatigiissusiornissaq Aleqap kissaatigaa

Aleqa Hammond aviisimi Politikenimi ullumi saqqummersumi taama allaatigisaqarpoq.

Folketingimut ilaasortaq Siumumeersoq naapertorlugu, Danmarkip Nunatsinni akisussaaffeqarfiini pimoorutiginngilai. Tamanna ilaatigut aatsitassarsiornerup iluani  upalungaarsimaniarnerup sullivinnillu nakkutilliinerup Danmarkip Nunatsinnut maanna isumagisassanngortinniagaata amigaateqarnerisigut takuneqarsinnaavoq.

Tamatumunnga peqatigitillugu assersuutigalugu Folketingimi isumaqatigiinniarnerni Nunarput naligiimmik peqatigisatut pineqarneq-ajorpoq, Aleqa Hammond KNR-imut taama erseqqissaavoq.

Taamaammat nunat marluusut namminersorneq pillugu isumaqatigiissut Free Associationimik aaqqissuussinermik taarsertariaqaraluarpaat.

- Namminersorneq pillugu isumaqatigiissut Free Associationimik aaqqissuussinermik taarserutsigu Nunarput pisortatigoortumik namminiilivissaaq. Taamaaliornikkullu nunat marluusut naligiissumik peqatigiillutik siunissami qanoq suleqatigiissanerlutik isumaqatigiissutigisinnaavaat, Aleqa Hammond allaatigisamini taama allappoq.

Nunattali aningaasaqarnikkut Danmarkimut isumaqatigiissutaa Namminersorneq pillugu isumaqatigiissutip Free Associationimik isumaqatigiissummik taarserneqassagaluarpat qanoq pineqassanersoq Aleqa Hammondip KNR-imut isummerfigiumanngilaa.