Løkke: Qinersisoqannginnerani inatsit nutarternissaat sulissutigaarput

Folketingimi tullissaanik qinersisoqannginnerani danskit inatsisaat nunatsinnut atuuttut nutartissagunik danskit naalakkersuisui tuaviortariaqarput, Aaja Chemnitz Larsen erseqqissaavoq. Ministeriunerup tamanna silatusaartumik anguniagassaasoraa.
Assi © : Martine Lind Krebs/Det Grønlandske Hus i København
februaarip 27-at 2018 15:50

Danskit naalakkersuisuisa danskit inatsisaat nunatsinnut atuuttut nutarterniarunikkit Folketingimut tullissaani qinersisoqannginnerani tassa qaammatit amerlanerpaamik 15-it atorlugit tuaviuutissavaat.

Aaja Chemnitz Larsen, Inuit Ataqatigiinneersoq, statsministerimut, Lars Løkke Rasmussenimut Folketingimi marlunngornermi apeqqarissaarnermi taama oqarpoq.

- Inatsimmi equngasoqarpoq, tamannalu kalaallit inuiaqatigiivini uningatitsivoq. Statsministerip naalagaaffeqatigiinnilu ministerip danskit nunatsinnut inatsisitoqaat naammaginarsoraa?

Tamatumanilu Lars Løkke Rasmussen ima akivoq:

- Apeqqummut naatsumik akigaanni: soorunami naamik, sumiiffinni pissutsit allaanerunissaat pisariaqanngippat nalinginnaasumik atuuttoq taamaaginnarpoq.

Løkke: Anguniagassaq piareeqqavoq

Danskit nunatsinnut inatsisaasa nutarternissaat naalakkersuisut tunngavissaanni immikkoortumi allassimavoq.

Inatsisinik atuutsitsinermut naalakkersuisup, Sara Olsvigip Naalakkersuisut Folketingimit allannguiffigineqarnissaanik kissaataat tassalu malittarisassanut siunnersuutit pingaarnersiukkat 64-it danskit inatsisinik atuutsitsinermut ministeriannut ukiaq nassiuppai.

AAMMA ATUARUK Sara Olsvig inatsiseqarnermut ministerimut kissaaterpassuaqartoq

Inatsiseqarnermullu susassaqarfiit kisimik pineqanngitsut, Aaja Chemnitz Larsen erseqqissaavoq.

Malittarisassammi aamma assersuutigalugu suiaaqatigiit anaanaaqatigiinnissaat aamma kalaallit suliffeqarfiini kinguaariinni kingornussisarnermut malittarisassat pisoqalisimasut, Chemnitz Larsen isumaqarpoq.

Danskilli nunatsinnut inatsisaasa folketingimi qinerseqqittoqannginnerani piareersinnaanissaat ministeriunerup neriorsuutigisinnaanngilaa.

- Folketingimut qinersisoqannginnerani anguniakkat tamarmik tikinneqarsinnaanersut qulakkeersinnaanngilara. Taamaaliorsinnaanngilanga. Ataatsimilli neriorsuisinnaavunga tassa tamatuma tungaanut ingerlaaratta. Kajuminnermillu takutitsilluta isumaqarpunga, Lars Løkke Rasmussen oqarpoq.

Namminersorlutik Oqartussat nammineq akisussaaffigileriikkaminnut atatillugu malittarisassanik naammaginartunik qulakkeerinissamut suliassaqangaatsiareersut Lars Løkke Rasmussenip erseqqissaatigaa.

AAMMA ATUARUK Dansk finanslov er en blandet fornøjelse