Aaja: Danskit aningaasanut inatsisissaat nuannaarutissaannaanngilaq
Nunatsinni eqqartuussiveqarnermut 40 mio. koruunit, kalaallit pinerluuteqarsimasunut inissiisarfiini sulisut ilinniarteqqinneqarnissaannut 1,2 mio. koruunit, kalaallit Danmarkimi illuutaasa ataanni kulturikkut suliniummut NUKIGA-mut 2,1 mio. koruunit danskillu inuusuttut akornanni nunatsinnut tunngasunik apersuisoqarsinnaanut millionit affaat.
AAMMA ATUARUK Halv million sat af til at undersøge viden om Grønland
- Taakku tamarmik pisariaqartinneqarput, IA-mit folketingimut ilaasortaq, Aaja Chemnitz Larsen KNR-imut oqarpoq.
Chemnitz Larsenip danskit aningaasaqarnermut ministeriata naalaaffiup 2018-imut missingersuutai pillugit attaviitsoq Aleqa Hammond ilanngullugu ataatsimeeqatigisarsimammatsik nuannaarutigaa.
- Isumaqatigiinniarnernut ilaanerput pingaarnertut nuannaarutigaara. Tamanna apummi tumiliornertut ataavartumik siumut sammissaaq. Aammattaaq ukioq kingullermiit tusaaniarneqarnerulluta misigisimavunga. Taamaammat ajunngitsumik ingerlagunarpugut – taamaakkaluartorli tamakkiisumik ilorrisimaanngilanga, Aaja Chemnitz Larsen oqarpoq.
AAMMA ATUARUK Nukiga danskit aningaasanut inatsisissaannit aningaasaliiffigineqartoq
Illersornissamut aningaasat isiginngitsuusaarneqartut
Naak ministeri tusarnaarluaraluartoq immikkoortoq qitiusoq – isumagineqarpallaanngitsoq, Aaja Chemnitz Larsen isumaqarpoq.
Kalaallit eqqartuussiveqarfiini illersuisut amerlanerusut atuarteqqinneqarnissaannut aningaasaliinissanik amerlanerusunik kiissaateqartoqaraluartoq danskit 2018-imut aningaasanut inatsisissaanni nipangiutiinnarneqarpoq.
- Tamatumani illersuisut ilinniartarnerisa pitsanngorsarneqannginnerani tamanna eqqartuussiveqarnermi tamarmut pakatsinarpoq. Nunatsinni illersuisuunermik atorfinitsitsisoqarpoq, aningaasalli malinnaanngillat. Danskit naalakkersuisuisa aningaasanut tamatumunnga salliutinngimmassut pakatsinartorujussuusoraara, Aaja Chemnitz Larsen oqarpoq.
AAMMA ATUARUK Aaja Chemnitzip isumaqatigiissut nutaaq isornartorsioraa
Danskit aningaasanut inatsimmi nunatsinni eqqartuussiveqarnermut ukiuni sisamani 40 mio. koruuninik immikkoortitsigaluartoq, Aaja Chemnitz Larsenip isornartorsiuinini attatiinnarpaa. Inatsiseqarnermut ministereqarfiup Namminersorlutik Oqartussallu isumaqatigiinniarnissaanni aningaasat taakku politiit, pinerluuteqarsimasunut isumaginnittoqarfiup eqqartuussiviillu akornanni agguaanneqassapput - kissaaterpassuaqarporlu.
- Ukiunut sisamanut 40 mio. koruuninik immikkoortitanik nunatsinni pisariaqartinneqartut annertunerungaatsiarput. Taamaammat nuannaarnerinnaanngitsoq kalaallit tungaanniit oqartoqarsinnaavoq, IA-mit folketingimut ilaasortaq oqarpoq.
Danskit 2018-imut aningaasanut inatsisissaat pillugu attaviitsup Aleqa Hammondip maanna nunatta avannaaniittup oqaaseqartinniarnera iluatsissimanngilaq.
Folketingip danskit aappaagumut aningaasanut inatsisissaat decembarip 22-ani taasissutigissavaa.
