Aaja Chemnitzip isumaqatigiissut nutaaq isornartorsioraa

- Isumaqatigiissut kalaallinit isigalugu pitsanngorsaatitaqaranilu suliniuteqartoqanngitsoq tunngaviusumik oqartoqarsinnaavoq. Tamanna uggornartorujussuusoraara.

Dansk Folkepartiit Socialdemokraatillu pinerlussimasunut isumaginnittoqarfik pillugu sapaatip akunnerata siuliani isumaqatigiissuteqareersullu Inuit Ataqatigiit folketingimut ilaasortaatitaat, Aaja Chemnitz Larsen taama isornartorsiuivoq.

Isumaqatigiissummi nunatsinnut atatillugu pinerluuteqarsimasunut inissiisarfissap ammarneqarnissaa kisiat sammineqarpoq.

Uani partiit isumaqatigiissutigaat Nuummi pinerluuteqarsimasunut inissiisarfik 2019-imi ammarpat kalaallit Herstedvesterip parnaarussivianiittut angerlartinneqarnissaat, Herstedvesterimiiginnarniartullu qanigisaasa akiliutsillutik tikeraartarnerat atorunnaarsinneqassasut pineqarput.

Inatsisartulli ukiakkut ataatsimiinnerminni kalaallit paarineqartut Nuummut nuunnertik peqqissimissuteqarsinnaaneranut siunnersuut akueraat. Siunnersuut taanna Folketingimi upernaakkut ataatsimiinnermi oqaluuserineqassaaq.

- Isumaqarpunga Inatsisartut suliamut matumunga qanoq isumaqarnerat (partiinit isumaqatigiissuteqartunit aaqq.) isiginiarneqarsimanngitsoq, Aaja Chemnitz Larsen oqarpoq.

Kissaaterpassuit ilanngutitinneqanngitsut

Nunatsinni inatsiseqarnermut susassaqarfiit, matumani pinerlussimasunut isumaginnittoqarfik ukiuni kingullerni tamanut ammasumik, ilaatigut Danmarkimi eqqartuussissuserisut siunnersuisoqatigiivisa nalunaarusiaani Folketingimilu tusarniaanerni oqallinnernilu ukkatarineqarpoq.

Nunatsinnilu inatsiseqarnermut susassaqarfik immikkut sammineqartariaqartoq partiit tamarmik Christiansborgimi nalunaarutigaat. Isumaqatigiinneralli suliniutinik aalajangersimasunik kinguneqarpasinngilaq.

AAMMA ATUARUK Herstedvesterimiittunut akeqanngitsumik angalasarnerit atorunnaarsinneqartut

Folketingimut ilaasortat Inuit Ataqatigiinneersup, attaviitsullu Aleqa Hammondip inatsiseqarnermut ministeri, Søren Pape Poulsen (K) kissaateqarfigaat, siunnersuutit ilaat eqqaalaaginnarlugit ilaatigut pinerluuteqarsimasunut inissiisarfinni sulisut amerlanerusut, pinerluuteqarsimasunut inissiisarfimmi sulisut ilinniaqqinnerat, pinerluuteqarsimasunut inissiisarfiit iluarsartuunneri, illersuisunut amerlanerusunut ilinniartinneqarnissaanullu aningaasat amerlanerusut kissaatigineqarput.

Atlantikulli avannarpasissuanit folketingimut ilaasortat arlaannaalluunniit isumaqatigiinniarnermut qaaqquneqanngillat. Inatsiseqarnermulli naalakkersuisup, Sara Olsvigip Søren Pape Poulsen susassaqarfik tamanna pillugu ataatsimeeqatigaat.

Isumaqatigiissummi suliniut alla danskit 2018-imut aningaasanut inatsisissaanni nunatsinnut eqqartuussiveqarnermut, ukiuni sisamani 40 mio. koruunit tunniunneqarnissai innersuussutigineqarpoq.

AAMMA ATUARUK Forvaringsdømte skal kunne fortryde flytning til Nuuk

Aaja Chemnitz Larsenip siunnersuut taanna akuerineqanngikkallarmalli nunatsinni eqqartuussiviit siuarsaavigineqartariaqarneranut naammannginnerarlugit isornartorsiorpaa.

Aaja Chemnitz Larsenip danskit parnaarussiviini kalaallillu pinerluuteqarsimasunut inissiisarfiini atukkat assigiinngissusaat annertuneruliinnassasorai.

- Danskit susassaqarfiini kisimi kivitsisoqarpat kalaallillu susassaqarfiini kivitsisoqarani pitsaassutsini taakkunani assigiinngissutsit anneruleraluttuinnassapput. Tamannalu uggornartorujussuusoraara, taamatummi akissaatitigut kinguleruttooraluttuinnassaagut.

Inatsiseqarnermut ministerimut kissaatit nassiunneqartut

Inatsiseqarnermut naalakkersuisup, Sara Olsvigip Naalakkersuisut nunatsinni inatsiseqarnermut susassaqarfinni atulersikkusutaasa allattorsimaffiat pingaarnersiuiffiusoq inatsiseqarnermut ministerimut, Søren Pape Poulsenimut sapaatip akunnerata siuliani nassiuppaa. Allattorsimaffik taanna ministerip nammineq piumasaraa.

AAMMA ATUARUK Sara Olsvig inatsiseqarnermut ministerimut kissaaterpassuaqartoq

Allattorsimaffik pinerluuteqarsimasunut isumaginnittoqarfik pillugu isumaqatigiissutip akuerineqarnissaanut sapaatip akunnerinnanngortoq nassiunneqartoq, Folketingimi Inuit Ataqatigiit ukioq manna martsimi siunnersuutaani siunnersuutigineqartut assigai.

- Tamanna Inatsisartuni Folketingimilu oqaluuserineqareerpoq, taamaammat susassaqarfippassuarni kissaaterpassuaqarnera nutaanngilaq. Danskit naalakkersuisui nunatsinneersunut tusarnaarnissamut periarfissarassuaqarnikuupput aamma uppersaatinik, ilaatigut pinerluuteqarsimasunut inissiisarfiit pitsanngorsaavigineqarnissaannut, Aaja Chemnitz Larsen oqarpoq.

KNR-ip inatsiseqarnermut naalakkersuisoq Sara Olsvig, inatsiseqarnermut ministeri Søren Pape Poulsen Folketingimilu attaviitsoq Aleqa Hammond suliaq pillugu oqaaseqartinniarsarai.