Herstedvesterimiittunut akeqanngitsumik angalasarnerit atorunnaarsinneqartut
Nuummi pinerluuteqarsimasunut inissiisarfissaq ammarpat kalaallinut isersimasunut piumasaqaatit allanngornissaat isumaqatigiissutigineqartoq, isumaqatigiissummi atuarneqarsinnaavoq.
Kalaallit pinerluuteqarsimasut Herstedvesterimiittut nunatsinnukarsinnaanissamut ullumikkut akuersissuteqarfigineqarsinnaapput. Malittarisassat ullumikkutut itsillugit pinerlussimasunik isumaginnittoqarfiup angalanermut aningaasartuutit akilertarpai.
Pinerluuteqarsimasorli nunatsinnukarusunngikkaanga qanigisai ukiumut ataasiarlutik Danmarkiliarsinnaatitaapput.
Isumaqatigiissutilli nutaat naapertorlugit, Nuummi pinerluuteqarsimasunut inissiisarfik 2019-imi ammarpat taakku atorunnaarsinneqassapput.
AAMMA ATUARUK Herstedvesterimi isertitat pillaatissartik sumi atussanerlugu nammineq toqqassavaat
Pinerluuteqarsimasunut inissiisarfissaq ammarpat kalaallit Herstedvesterimi parnaarussivimmiittut nunatsinnut nuukkusunnerlutik namminneq aalajangersinnaatitaavaat. Siunissamili nunatsinni eqqartuunneqartut tamarmik nunatsinniittussatut pineqaatissiissuteqarfigineqartassapput.
Pinerluuteqarsimasunulli inissiisarfik ammarpat Herstedvesterimiittunut pissutsit qanorpiaq inissinneqassanersut suli nalunarput. Herstedvesterimiittut Nuummut nuunnertik peqqissimissutigisinnaasariaqaraat, Inatsisartut isumaqarput.
Tamatuma saniatigut Inatsisartut kalaallinut Herstedvesterimiittunut immikkut neqeroorutit soorlu kalaallisut naalagiarneq kalaallit nerisassaataat neqeroorutigineqaannartariaqarsoraat. Tamanna inatsiseqarnermut ministereqarfiup inatsisissatut siunnersuutaanut akerliuvoq.
Herstedvesterimi inissinneqarsimasunut malittarisassat nutaat Folketingimi tulliani oqallisigineqassapput.
AAMMA ATUARUK Herstedvesterimi isertitat pillaatissartik sumi atussanerlugu nammineq toqqassavaat
AAMMA ATUARUK Indsatte drøfter muligheden for at vende hjem
