Naalakkersuisut: Herstedvesterimi isertitat pillaatissartik sumi atussanerlugu nammineq toqqassavaat
Innuttaasut kalaallit katillugit 28-t Danmarkimi piffissami killiligaanngitsumi ullumikkut isertitsivimmiitinneqarput. Nuummilu isertitsivittaassaq ammarneqarpat, inuit piffissami killiligaanngitsumi pineqaatissinneqartut tassani immikkoortortami matoqqasumi pillaatissartik atortassavaat.
AAMMA ATUARUK Herstedvesterimut utersinnaatitaanissamut pissutsit immikkut ittut atuuttariaqassapput
Danskilli naalakkersuisuisa siunnersuutaat naapertorlugu, kalaallit Herstedvesterimi ullumikkut isertitat tassaniiginnassanerlutik imaluunniit Nuummi isertitsivittaassamut nuutsinneqassanerlutik nammineq toqqagassarissavaat.
Taamatullu aaqqissuussisoqarniarnera Naalakkersuisut taperserpaat.
AAMMA ATUARUK Byggeriet af anstalten forsinket igen
Danmarkimi inatsisinik atuutsitsinermut ministereqarfiup naliliinera naapertorlugu, kalaallit Herstedvesterimi isertitat arlallit Nunatsinnut atassuteqarpallaarunnaarlutik Danmarkimut atassuteqarnerulersimapput. Taamaammat pillaatimik sinnera sumi atussanerlugu namminneq toqqagassarisariaqarpaat, inatsisissatut siunnersuummi taama allassimasoqarpoq.
Siunnersuut ataasinngormat oqaluuserineqarpoq Inatsisartullu isumaqatigiissut Inatsisartut Inatsisinut ataatsimiititaliaannut ingerlateqqippaat.
Siunnersuut novembarip qulingiluaani aappassaaneerneqassaaq, tamannalu pereerpat siunnersuut Folketingimi oqaluuserineqassalluni.