Herstedvesterimiittut: Utersinnaalernissaq eqqartortarparput
Kalaallit Herstedvesterimi inissinneqarsimasut ilagaat 34-inik ukiulik Aartu Kleist, taassuma nunatsinnut nuunneqarnissani qinnutiginiarpaa.
Allali soorlu 53-inik ukiulik Jens Mikaelsen, katsorsarneqarnissamik periarfissat iluatigalugit, Danmarkimiiginnarusuppoq:
-Maqaasinngilara nunarput, ukiut arfineq-marlunngulerpakka piffissami killiligaanngitsumik maani isersimallunga
imminut suliarillunga maaniippunga. Nuummut pissaguma takorloorsinnaagakku aallaqqaataaniit aallarteqqillugu, taava uannut aamma kinguarsaataassagami, Jens Mikaelsen oqarpoq.
AAMMA ATUARUK Herstedvesterimi isertitat pillaatissartik sumi atussanerlugu nammineq toqqassavaat
Aartu Kleistili nunatsinnut uterusuppoq:
- 2013-imi apriilimi eqqartuussaavunga. Nunarput qimallugu aallartitaanikuulluni annernartorujussuuvoq. Taava kalaallisuinnaq oqaaseqarnera peqqutaalluni paatsoorneqartarpunga taavalu paatsuuisarlunga uanga, Aartu Kleist oqarpoq.
Kalaallit Herstedvesterimiittut nuunnissamut periarfissaalertussaq eqqartortaraat, Jens Mikaelsen oqaluttuarpoq:
- Pulaffigillattaartarparput taassuma atuutilernissaa, taavalu ilai nuukkusupput, ilai aporfeqarput. Affaasa missai Nuummut nuukkusupput, Jens Mikaelsen oqarpoq.
Naak Herstedvesterimi oqalutseqaraluartoq Aartu Kleistip danskisut oqaaseqartuunnginnini ulluinnarni aporfigisarpaa:
AAMMA ATUARUK Pineqaatissinneqarsimasunut aningaasartuutit isumaqatigiinngissutaasut
- Saaffissaaleqinartartorujussuuvoq ilaannikkooriarluni oqaatsinik killeqartarnermik. Psykologi qallunaaq, narkorsat qallunaat, betjentit qallunaat, atuarfimmi qallunaat, sulisitsisut qallunaat.
Taassuma saniatigut Kalaallit Nunaanni pinngortitaq inuillu maqaasivai.
- Taava aatsaat tamaanga pigama sivitsulaareertoq malugisinnaallugu kakkaak; qaqqat, imaq, suliffik, inuit qanilaartut, soorlu tamakku maqaasinartorujussuupput sakkortuumillu maqaasinartarlutik.
Jens Mikaelsenilli nunarput maqaasinngilaa.
- Nunarput qimallugu maaniinnera malugisimassutiginngilara siusinnerusukkut maaniittarnikuugama taavalu maani ilaquttakka amerlanerullutik. Taamaattumik maqaasinngilara, Jens Mikaelsen oqarpoq.
