Ataatsimiititaliaq: Kangerluarsoruseq isaterneqarli

Kangerluarsoruseq aserfallannikooqimmat eriagisariaaruttoq, nalunaarusiami nutaami inerniliunneqarpoq.
maajip 22-at 2018 06:52

Aalisariutinut umiarsualiviusimasoq Nuup kujataatungaaniittoq Kangerluarsoruseq aserfallannikooqimmat eriagisariaaruppoq.

Tamanna nalunaarusiami nutaami inerniliunneqarpoq.

Immikkut ilisimasallit A/S Nordafarimi, tassa Kangerluarsorusermi, illut atortullu qimatat siorna misissoreerlugit nalunaarusiortuupput.

AAMMA ATUARUK Kangerluarsorusermi torersaassinissaq piareersarneqalertoq

Misissuiartortut illorpassuit ullut aqqanillit siorna maajimi nalunaarsorlugillu misissorpaat. Imalu inerniliipput:

Nordafari nakkaatiinnariaavoq - aamma imaanut.

Paasissutissat: 
Kangerluarsorusermi Nordafarimi torersaanissaq 2007-mili isumaqatigiissutigineqarpoq. Tamanna Naalakkersuisut siulittaasuata Kim Kielsenip savalimmiormiut lagmandiannut Aksel V. Johannesenimut 2016-imi eqqaasitsissutigaa, taava misissuinerit aatsaat aallartipput. 

Ulorianartorsiorfiusoq

Allaallumi illuniinneq ulorianarluni, misissueqataasup erseqqissaatigaa:

- Ilaat ima aserfallassimatigaat allaat najussallugit ulorianarlutik, illuliassanik titartaasartoq Bardur Dam I Baianstuvo KNR-imut oqarpoq. 

Taanna Landsverkimi, tassa Savalimmiut sanaartornermut attaveqaqatigiinnermullu suliffeqarfiutaanni sulisuuvoq Kangerluarsorutsillu oqaluttuarisaanera soqutigisaralugu.

- 80-ikkunni pisariaaruppoq, illukoqarfiinnanngorput. Illukoqarfiuneralumi alutornaqaaq.

Millioninik akeqassasoq

Nalunaarusiaq naapertorlugu illut oqaluttuarisaanermut ilaasut ilaannakortumik aserfallatsaalinerat qanoq akeqassanersoq nalunarpoq.

Kisianni isaterneqarnerat piiarneqarnerallu, 23-niit 57 millionit koruuninut akeqassapput, Savalimmiut politikeriisa sorleq qinissaneraat apeqqutaalluni.

AAMMA ATUARUK Savalimmiormiut Kangerluarsorutsimi saliinissamut aningaasassarsiortut

Ataatsimiititaliallu innersuussutigaa, illut aserfallassimaqimmata isaterneqariarlutik immikkoortiterneqassasut taava aamma atortut tarajuusivikumi ikuallanneqassasut.

- Arlaannik atorsinaasoqarpat, inuit perusutaminnik aallersinnaapput. Tamanna uagut siunnersuutigaarput. Ajornanngippallu toqqortaralugit. Tamanna inassutigaarput, Baianstuvo oqarpoq.

Aaqqiissut D-mik taaneqartoq 22,7 millionit koruuninik akeqassasoq, nalunaarusiami allassimavoq.

Lagtingip nunarput utaqqigaa

Lagtingip aalajangiinissaa maanna tullernguuppoq.

Lagmand Aksel V. Johannesen naapertorlugu Kalaallit Nunaata siunnersuuteqarnissaa utaqqiinnarpaat. Det Færøske Nyhedsbureau taama allaaserisaqarpoq.

Nalunaarusiaq Pinngortitamut Avatangiisinullu Naalakkersuisoqarfimmut nassiunneqareerpoq politikkikkulli suli suliarineqarnani.

- Salliutipparput savalimmiormiullu nalunaarusiaat misissoqqissaarlutigu, naalakkersuisoqarfimmi pisortaq Mette Skarregaard KNR-imut oqarpoq.