Naak pitsanngoriaateqaraluartoq nunatta pisiai tunisaanit 800 mio. kr.-inik amigartooruteqarfiupput

Tassani takuneqarsinnaavoq,  siorna piffissap taamaalineranut naleqqiullugu nioqqutissianik eqqussukkavut avammullu tunisavut ikinnerusut, nunanillu allanit pisiavut tunisatsinnit suli naleqarnerusut.

Ukiup affaani siullermi nioqqutissanik 1,8 milliardit koruunit nalinginut eqqussuivugut, piffissami tassani milliardit koruunit ataatsit sinnilaaginnarlugit tunisaqarluta, tassalu nunani allanik niueqateqarnitsinni 800 millionit koruuninik amigartooruteqarsimavugut. Tamannali 35 millionit missaannik pitsanngoriarnerusoq, Naatsorsueqqissaartarfik allappoq.

Nunanut allanut tunisatta ikileriarnerannut aalisakkat qaleruallillu tunisatta ikileriarsimanerat peqqutaanerpaavoq, tassalu aalisakkanik qalerualinnillu tonsinik ikinnerusunik tunisaqarsimavugut. Raajat fire procentimik ikinnerusut tunisimavagut, saarulliit 17 procentimik qalerallillu 2 procentimik ikinnerusut ukiup alffaani siullermi tunisimallutigik.

Eqqussukkatta ikileriarnerannut peqqutaaneruvoq, atortorissarutinik innaallagiatortunik angallassissutinillu ikinnerusunit eqqqussisimagatta.
Aamma nerisassanut najoqqagassanullu aningaasartuutikinnerusimavugut, tamakkununnga aningaasartuutigut 28 millionit koruuninik ikilisimapput.